आँखुखोला जलविद्युतको हकप्रद सेयर बाँडफाँड, १७.५० लाख कित्ता अवितरित

काठमाण्डौ । आँखुखोला जलविद्युत कम्पनी लिमिटेडले निष्काशन गरेको हकप्रद सेयर बाँडफाँड गरेको छ । कम्पनीले गत साउन २७ गतेदेखि भदौ १६ गतेसम्म निष्कासन गरेको हकप्रद सेयरको बाँडफाँड भदौ ३० गते गरेको हो ।  

उक्त बाँडफाँड निष्कासन तथा बिक्री प्रबन्धक नाबिल इन्भेष्टमेन्ट बैंकिङको कार्यालयमा भएको हो ।  

कम्पनीले गत असार ३१ गतेसम्म कायम साविकका सेयरधनीहरुका लागि १ कित्ता सेयरबराबर नयाँ १.५ कित्ता (१ः१५) अनुपातमा प्रति कित्ता रु.१०० अंकित दरको १ करोड २० लाख कित्ता हकप्रद सेयरको निष्काशन तथा बिक्री खुला गरेको थियो ।  

उक्त हकप्रदमा रितपूर्वक आवेदन दिने ४१ हजार ३६२ जना सेयरधनीहरुलाई १ करोड २ लाख ४९ हजार ७५२ कित्ता हकप्रद सेयर बाँडफाँड भएको कम्पनीले जनाएको छ । यस हिसाबले कम्पनीको १७ लाख ५० हजार २४८ कित्ता हकप्रद सेयर अवितरित रहेको छ ।  

आफ्नो कायम हक भन्दा बढी सेयर माग गरि दरखास्त दिने आवेदकहरूको हकमा बाँडफाँडमा नपरेका हकप्रद सेयर वापतको रकम असोज ४ गतेदेखि आईपीएसमार्फत सम्बन्धित आवेदकहरूको बैंक खातामा रकमान्तर गरिने व्यवस्था मिलाइएकोले कम्पनीले जनाएको छ ।