नेप्सेमा उच्च अंकको सुधार, जानकार भन्छन्, ‘घट्न रोकिएको संकेत’

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) मा दोहोरो अंकको उछाल आएको छ । आज नेप्से परिसूचक १.९९ प्रतिशत अर्थात ४९.१८ अंकले बढेर २ हजार ५१९.५७ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.७८ प्रतिशतले बढेर ४५२.८० विन्दुमा पुगेको छ । यो दिन नेप्सेमा सूचीकृत मध्ये ३२७ वटा स्क्रिप्टको १ करोड २४ लाख ९८ हजार ९८९ कित्ता सेयर ४ अर्ब ८१ करोड ३२ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार सुवासचन्द्र ढुंगाना भन्छन्,  ‘आजको बढोत्तरीले बजार करिब–करिब घट्न रोकिएको जस्तो देखिएको छ । तर यसको निश्चिनताका लागि भने अझै केही कारोबार पर्खनु पर्ने हुन्छ । ’

आज बजार बढेता पनि भोल्युम भने बढ्न नसकेको उनले बताए । ‘यदि १० दिनको कारोबारको औषत भोल्युम ६ अर्बभन्दा माथि आएमा बजारले अप ट्रेण्ड लिएको मान्न सकिन्छ । आजबाट बजारले एउटा सिग्नल भने दिएको छ,’ उनले भने ।  

आधारभूतमा रुपमा भने अल्पकालिन करेक्सन मात्रै रहेको उनी बताउछन् ।  

अर्का बजार जानकार उपेन्द्र पाठकले पछिल्लो समय बजार घट्नु नै आश्चर्य पार्ने खालको भएको बताए । पाठक भन्छन्, ‘अहिलेको ब्याजदर र सेयरको मूल्य हेर्ने हो भने, सेयर निकै सस्तो देखिएको छ । फाइनान्स समूहका केही खेलाडी र ब्रोकरबीचको विवादका कारण बजारमा गिरावट आएको थियो ।’

आज पैसा हुनेले मात्रै सेयर खरिद गरेका कारण ५ अर्ब भन्दा तल भोल्युम आएको उनले बताए ।      

यो दिन नेप्सेमा सूचीकृत १३ वटा समूहमध्ये म्युचुअल फण्ड बाहेक अन्य सबैमा हरियाली छायो । आज फाइनान्स समूह सर्वाधिक बढेको छ । फाइनान्स समूह ३.८० प्रतिशतले बढेको छ ।  

बैंकिङ समूह आज १.८० प्रतिशत, विकास बैंक,२.७५,होटल ३.५०,हाईड्रो २.६०,लगानी १.५६,जीवन बीमा १.९१,उत्पादन तथा प्रशोधन १.४४,लघुवित्त १.४९,निर्जीवन बीमा १.६७,अन्य १.७५ र व्यापार समूह १.७८ प्रतिशतले बढ्यो ।  

म्युचुअल फण्ड मात्रै आज ०.०१ प्रतिशतले घट्यो ।  

धेरै कारोबार गर्ने कम्पनीहरु

यो दिन ङादी ग्रुप पावर कम्पनीको सर्वाधिक सेयर कारोबार भएको छ । यो कम्पनीको आज १५ करोड ६१ लाख बढीको सेयर कारोबार भएको छ । अरण भ्याली हाईड्रको आज १३ करोड ५४ लाख, सिईडिबि हाईड्रोको १३ करोड ७ लाख,हिमालयन रि इन्स्योरेन्सको १२ करोड ७१ लाख र अपि पावरको १२ करोड ३४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ६ वटा कम्पनीको सेयरमूल्यमा सकारात्मक सर्किट लाग्यो । आज विन नेपाल लघुवित्त,न्यादी हाईड्रोपावर,युनिक नेपाल लघुवित्त,सगरमाथा जलविद्युत,थ्रिस्टार हाईड्रो र माथिल्लो मैलुङ खोला जलविद्युतको सेयरमूल्यमा अपर सर्किट लाग्यो ।  

यस्तै आज कुथेली बुखरी स्मल हाईड्रोको सेयरमुल्य ८.३९ प्रतिशत,आत्मनिर्भर लघुवित्तको ८ प्रतिशत र सिनर्जी पावरको सेयरमूल्य ७.७८ प्रतिशतले बढ्यो ।  

यो दिन हिमालयन हाईड्रोपावरको सेयरमूल्य सर्वाधिक अर्थात ६.३६ प्रतिशतले घट्यो ।