आज पनि नेप्सेको गिरावट जारी, जानकार भन्छन्,‘असोज मसान्त, दशैं तथा बाढीपहिरोको दबाब’

काठमाण्डौ । साताको पहिलो कारोबार दिन आज पनि नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.९२ प्रतिशत अर्थात २३.१० अंकले घटेर २ हजार ४६३.६६ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५७ प्रतिशतले घटेर ४४४.८८ विन्दुमा झरेको छ । यो दिन नेप्सेमा सूचीकृत मध्ये ३२७ वटा स्क्रिप्टको १ करोड २ लाख ९१ हजार ८९६ कित्ता सेयर ४ अर्ब ४ करोड १ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार विरेन्द्र विष्ट भन्छन्,  ‘लगातार घटिरहेको बजारमा आज बाढीपहिरोको प्रभाव समेत परेको छ । बाढीपहिरोका कारण जलविद्युत आयोजनाहरुको उत्पादन प्रभावित बनेका छन् ।’

यस्तै सत्ता फेरिने त्रासले समेत बजार घटेको उनले बताए । ‘तर अब सरकार परिवर्तनको सम्भावना टरिसकेको छ र बजार २४२० भन्दा तल नजाने देखिन्छ । लगानीकर्ताले घटेर बेच्न नचाहेका कारण कारोबार घटेको हो,’उनले भने ।  

नेपाल पूँजीबजार लगानीकर्ता संघकि अध्यक्ष राधा पोखरेलले बजारले अझै पनि नीतिगत सुधार खाजेको बताइन् । ‘जोखिमभार घटाउने र व्यक्तिगततर्फको सिमा हटाउने जस्ता नीतिगत सुधार अब लगानीकर्ताले खाजेका छन् । सरकार र अर्थमन्त्री पूँजीबजार प्रति सकारात्मक भएकाले पछिल्लो समय केही अफवाले घटेको बजार पुनः लयमा फर्कने सम्भावना देखिन्छ ।’

बजार घट्नुमा असोज मसान्त र दशैंको प्रभाव पनि रहेको उनले बताइन् ।  

यो दिन नेप्सेमा सूचीकृत १३ वटा समूहमध्ये एउटा बाहेक अन्य सबैमा रातो पोतियो । आज उत्पादन तथा प्रशोधन समूह मात्रै १.०३ अंकले बढ्यो ।  

यो दिन व्यापार समूहमा सर्वाधिक गिरावट आयो । यो समूह आज २.९७ प्रतिशतले घट्यो । बैंकिङ समूह आज ०.७४ प्रतिशत, विकास बैंक ०.८९ प्रतिशत, वित्त १.९१, होटल १.४७,हाईड्रो २.३६,लगानी १.४०,जीवन बीमा ०.३१,लघुवित्त ०.१८,म्युचुअल फण्ड १.२१,निर्जीवन बीमा ०.१५ र अन्य समूह १.०२ प्रतिशतले घट्यो ।  

धेरै कारोबार गर्ने कम्पनीहरु

यो दिन एनएलजी इन्स्योरेन्सको सर्वाधिक सेयर कारोबार भयो । यो कम्पनीको आज १५ करोड ८८ लाख,सिईडिबि हाईड्रोको १४ करोड ९८ लाख, अपि पावरको १३ करोड ६४ लाख, हिमालयन रि इन्स्योरैनसको १२ करोड ८३ लाख र शिवम् सिमेन्टको ८ करोड ५८ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनै पनि कम्पनीको सेयरमूल्यमा अपर सर्किट लागेन । ईङ्ग्वा हाईड्रोपावर आज सर्वाधिक सेयरमूल्य बढ्ने कम्पनीको रुपमा रह्यो । कम्पनीको सेयरमूल्य आज ५.४६ प्रतिशतले बढेर प्रतिकित्ता ५०२ रुपैयाँ कायम  भयो ।  

एनएलजी इन्स्योरेन्सको सेयरमूल्य पनि आज ४.४९ प्रतिशत,सोनापुर मिनरल्सको ४.१४ र विजय लघुवित्तको ३.९३ प्रतिशतले बढ्यो ।  

अपर स्याङ्ग्यो हाईड्रोको सेयरमूल्य आज सर्वाधिक अर्थात ९.९९ प्रतिशतले घट्यो । अपर हेवाखोलाको मूल्य पनि आज ९.१७ प्रतिशत,मकर जितुमाया सुरी हाईड्रोको सेयरमूल्य ८.८२ प्रतिशत र पाँचथर पावरको सेयरमूल्य ८.२७ प्रतिशतले घट्यो ।