धितोपत्र बोर्ड अध्यक्षको विषयले बजार तात्दै, कसको सम्भावना बढी ?

काठमाण्डौ । लामो विवाद र रस्साकस्सी पछि पुनःधितोपत्र बोर्डको अध्यक्षको प्रक्रिया अघि बढेको छ । अघिल्लोपटक अनुपस्थित ३ जनालाई नेपाल सरकारले एक सूचना जारी गरेर असोज १८ गतेको लागि व्यवसायिक कार्य योजना प्रस्तुती र अन्तरवार्ताका लागि बोलाएको छ । यससँगै अब नयाँ भन्सार मानिएको धितोपत्र बोर्डमा अध्यक्ष को बन्ला ? भनेर पुनः बजारमा चर्चा हुन थालेको छ ।  

धितोपत्र बोर्डको अध्यक्षको पद यति पेचिलो बनेको छ कि यसै विषयका कारण अघिल्लो सरकार नै ढलेको चर्चा समेत बजारमा हुने गरेको छ । प्रचण्ड प्रधानमन्त्री रहँदा रहेका अर्थमन्त्री वर्षमान पुनले धेरै प्रयास गर्दा पनि अध्यक्ष चयन गर्न सकेनन् । तत्कालिन अवस्थामा विचौलिया यति सक्रिय र शक्तिशाली बनेर निस्कियो कि सरकार ढल्नुको एउटा कारण धितोपत्र बोर्डको अध्यक्षको पद पनि रहेको स्वयं त्यस बेलाका प्रधान्मन्त्री र अर्थमन्त्रीले समेत स्वीकारेका थिए ।  

त्यसो भए के कारणले यति पेचिलो बन्दै छ धितोपत्र बोर्डको कुर्चि ? यसको मुख्य कारण भनेको सेयर बजारमा करिब ६५ लाख लगानीकर्ताको आकर्षण नै पहिलो कारण हो । धेरै मानिसको आकर्षण भए पछि जस्तो सुकै कम्पनीको आईपीओ आए पनि सहजै बिक्छ ।  

त्यसैगरी, दोस्रो कारण भनेको नयाँ स्टक एक्सचेञ्ज पनि प्रमुख हो । अघिल्लो सकरकारकै समयमा नयाँ स्टक एक्सचेञ्जको बिषयमा राष्ट्र बैंकका एक अधिकारी चिन्तामणी शिवाकोटिको संयोजकत्वमा बनेको समितिले नयाँ स्टक एक्सचेञ्जको ढोका खुला गरि दिएको छ । यसै कारण पनि कुनै समयमा धितोपत्र बोर्डमा जानै नचाहनेहरु अहिले थैली बोकेर मरिहत्ते गरेको बजारमा चर्चा चल्दै आएको छ ।  

कसको सम्भावना बढी ?

बजार सम्बद्ध स्रोतका अनुसार अझै पनि धितोपत्र बोर्ड अध्यक्ष नियुक्तीको लागि बिचौलिया दीपक भट्ट सक्रिय रहेका छन् । उनको समूह त्यति सहजै हार मान्ने समूह होइन । बोर्डको अध्यक्ष जो बने पनि उनकै पकेटबाट हुने बजारमा चर्चा छ । भट्ट पहिलेका लगानी बोर्डका अध्यक्ष शुशिल भट्टका भाई हुन । उनका दाजुभाइको नै शेर बहादुर देउवा र प्रधानमन्त्री केपि शर्मा ओलीसँग निकट सम्बन्ध रहेको छ ।  

नयाँ स्टक एक्सचेञ्ज हात पार्न यो समूहले जति पनि थैलि बुझाउन तयार रहेको जानकार बताउछन् । स्रोतले भन्यो, ‘माओबादी खेमाका तीन जनालाई अहिले अध्यक्षको आश्वासन दिएर अन्तरवार्तामा बोलाइँदै छ । ती तिन जनालाई अन्तरवार्तामा प्रक्रिया पुराउन मात्रै बोलाइएको हो । उनीहरुलाई अध्यक्ष बनाउने सम्भावना निकै कम छ । यो औपचारिकताका लागि मात्रै गरिएको हो ।’

स्रोतले ३ जनाको सम्भावना नै शुन्य रहेको समेत दाबी गरेको छ । ‘त्यस पछि बाँकी रहेका सन्तोषनारायण श्रेष्ठको सम्भावना अधिक रहेको छ,’स्रोतले भन्यो । अघिल्लोपटक प्रक्रिया रोकिएपछि सन्तोषनारायण श्रेष्ठले प्रक्रिया अगाडि बढाउन भन्दै अदालतसम्म पुगेका थिए । यसैकारण बिचौलियाको उनीलाई राम्रै आश्वासन रहेको र सम्भावना पनि बढी रहेको प्रष्टै देखिन्छ । तर बिकल्पमा भने बिचौलियाहरुले बोर्डभित्रकै मुक्तिनाथ श्रेष्ठलाइ राखेको स्रोतको दाबी रहेको छ ।