कारोबार वृद्धिका साथ नेप्सेमा झिनो अंकको बढोत्तरी, ‘लगानीकर्ता बिस्तारै बजार प्रवेश गर्दै’

काठमाण्डौ । साताको अन्तिम कारोबार दिन आज पनि नेपाल स्टक एक्सचेञ्च (नेप्से) झिनो अंकले बढेको छ । आज नेप्से परिसूचक ०.०९ प्रतिशत अर्थात २.४७ अंकले बढेर २ हजार ७४५.३६ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२६ प्रतिशतले बढेर ४९५.३० विन्दुमा पुगेको छ । यो दिन नेप्सेमा सूचीकृत मध्ये ३१६ वटा स्क्रिप्टको १ करोड ८८ लाख ७ हजार ४९२ कित्ता सेयर ७ अर्ब १९ करोड २७ लाख रुपैयाँभन्दा बढीको कारोबार भएको  छ ।

अघिल्लो दिन भने ५ अर्ब ६६ करोड रुपैयाँबराबरको कारोबार भएको थियो ।  

आजको बजारबारे बजार जानकार उपेन्द्र पाठक भन्छन्, ‘आजबाट दशैं पनि सकिएको कारण लगानीकर्ताहरु बजारमा फर्केका छन् । अब बिस्तारै सूचक र कारोबार पनि बढ्दै जान्छ । आज वाणिज्य बैंकहरुमा लगानीकर्ताहरुको आकर्षण बढेको देखिन्छ । यो भनेको नेपाल राष्ट्रबैंकले बैंकहरुलाई केही सहज नीति लिएको कारण नै हो ।’

कार्तिक ७ गतेसम्म सबै बैंकहरुको रिपोर्ट आउने र बजारको दिशा थप प्रष्ट हुनेमा पाठक विश्वस्त देखिए । पाठकले धेरै जस्तो बैंकहरुको रिपोर्ट २० देखि २५  रुपैयाँसम्म आउन सक्ने पनि आँकलन गरे । यसकारण अब बजार बैंकिङ क्षेत्रले डोर्याउने पनि उनको तर्क रहेको छ ।  

अर्का बजार जानकार रुपेश महर्जनले पनि आज बजारमा इन्ट्रा डे करेक्सन भएको तर कारोबार तथा भोल्युम बढ्नु सकरात्मक पक्ष रहेको बताए । महर्जनले अब कार्तिकबाट नयाँ पैसा बजारमा आउँदा नेप्सेले गति लिने विश्वास व्यक्त गरे ।

यो दिन नेप्सेमा सूचीकृत १३ वटा समूहमध्ये ७ वटा समूहमा हरियाली छायो भने अन्य ६ वटा समूहमा भने रातो पातियो ।  

आज म्युचुअल फण्ड समूह सर्वाधिक बढ्यो । यो समूह आज १.४० प्रतिशतले बढ्यो । यस्तै बैंकिङ समूह ०.४० प्रतिशत,वित्त ०.५१,लगानी ०.७१,उत्पादन तथा प्रशोधन ०.२१ र अन्य समूह ०.३६ प्रतिशतले बढ्यो । निर्जीवन  बीमा समूह पनि आज ०.७५ अंकले बढ्यो ।  

व्यापार समूह आज सर्वाधिक घट्यो । होटल समूह १.४८ प्रतिशतले घटेको आज विकास बैंक ०.६४,हाईड्रो ०.१२,जीवन बीमा ०.२४,लघुवित्त ०.१९ र होटल समूह १.४८ प्रतिशतले घट्यो ।  

धेरै कारोबार गर्ने कम्पनीहरु

यो दिन कुमारी बैंकको सर्वाधिक सेयर कारोबार भयो । आज यो कम्पनीको ३३ करोड १३ लाख बढीको सेयर कारोबार भयो । यस्तै एचआईडीसएलपीको आज २६ करोड ६२ लाख,हिमालयन रि इन्स्योरेन्सको २० करोड २३ लाख,ङादी ग्रुप पावरको १८ करोड ५६ लाख र गूडविल फाइनान्सको १८ करोड ३९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनै पनि कम्पनीको सेयरमूल्यमा अपर सर्किट लागेन । आज गूडविल फाइनान्सको सेयरमूल्य सर्वाधिक अर्थात ७.६३ प्रतिशतले बढ्यो । समाज लघुवित्तको सेयरमूल्यको पनि आज ५.१२ प्रतिशत र राँवा इनर्जीको सेयरमूल्य ५.१२ प्रतिशतले बढ्यो ।  

यो दिन अपर स्याङ्गे हाईड्रोको सेयरमूल्य सर्वाधिक अर्थात ५.१९ प्रतिशतले घट्यो । मिड सोलु हाईड्रोको सेयरमूल्य पनि आज ५.०३ प्रतिशत,सामुदायिक लघुवित्तको ४.४७ र सपोर्ट माईक्रोफाइनान्सको ३.४१ प्रतिशतले घट्यो ।