चाडपर्व अघि किन खुलेर सेयर किनेनन् ठूला लगानीकर्ताले ? यसो भन्छन् ब्रोकर

काठमाण्डौ । गत भदौ २ गते ३ हजार विन्दुमा पुगेको सेयर बजारले त्यसपछि साढे २ महिना खासै गति लिन सकेन । त्यो समयमा झण्डै ३० अर्ब भएको सेयर कारोबार हाल ५–६ अर्बमा सीमित भएको छ । यो साढे २ महिनाको समयावधिमा बजार बढ्न नसक्नुमा कारोबार तथा भोल्युम बढ्न नसक्नु नै मुख्य कारण रहेको देखिन्छ । जबसम्म १० अर्ब भन्दामाथि भोल्युम तथा कारोबार आँउदैन त्यो समयसम्म सेयर बजारले गति नलिने ब्रोकरहरु बताँउछन् ।

त्यसो भए किन ठूलो भोल्युम र कारोबारको साथ बजाले गति लिन सकेन त ? केही बजार जानकार ठूला लगानीकर्ताहरुले खुलेर सेयर नकिन्दा बजारले गति लिन नसकेको तर्क गर्छन् ।  यसै विषयमा कोहिनुर सेक्यूरिटिज  (स्टक ब्रोकर नम्बर ३५) का सञ्चालक भरत रानाभाट दशैं तिहारअघि बजार नबढेको भनेर मान्न तयार छैनन् ।

रानाभाट भन्छन्, ‘३ हजारबाट घटेर २४४० विन्दुसम्म पुगेको बजार २६७४ विन्दुमा बन्द भएको छ । यो भनेको बजार सुधार भएकै हो । अहिले खासगरि लगानीकर्ताहरु कोही विदेशमा छन् त कोही राजधानी बाहिर छन् । राजधानीमा नै रहेका लगानीकर्ता पनि पर्ख र हेरको अवस्थामा छन् ।’

उनले दशैं तिहारको बीचमा जम्मा १०÷१२ दिन मात्रै कारोबार भएको र कर्जा लिएर सेयर कारोबार गर्नेले पनि आउने त्रैमास कुरेको समेत बताए । ‘त्यही कारणले नै ठूलो कारोबार नभएको हो । अब छठ पछि खुलेको बजारले नै स्पष्ट दिशा निर्धारण गर्नेछ,’ उनले भने ।  

यसै विषयमा कालिका सेक्यूरिटिज (स्टक ब्रोकर नम्बर ४६) का सञ्चालक नरेन्द्र सिजापति सेयर बजारमा पनि ठूला कारोबारी भनेका ठूला उद्योगी नै रहेको बताउँछन् ।  उनी भन्छन् ‘अहिले उद्योगीहरु विद्युत महशुलको विवाद मिलाउनतर्फ नै लागेको कारण बजारमा केही प्रभाव देखिएको हो । अब केही समयमा विद्युतको विषयमा सेटलमेन्ट भएपछि बजारले अल टाइम हाई बनाउने छ ।’

यसको अतिरिक्त राजनीतिक तथा बाढी पहिरोका कारण पनि सेयर बजारमा प्रभाव परेको उनको बिचार रहेको छ । अर्का एक ब्रोकरले पनि नाम नलेख्ने शर्तमा भने, ‘बजारमा अहिले राजनीतिक तथा चाडपर्वको कारणले नै लगानीकर्ता ढुक्क हुन नसेका हुन् । 

अन्तराष्ट्रिय रुपमा पनि केही द्धन्द्ध रहेको कारण बजारले गति लिन नसकेको हो र।’ उनले सरकारको तर्फबाट पनि सोचे जसरी काम हुन नसकेको गुनासो समेत गरे । अब धितोपत्र बोर्डको अध्यक्ष नियुक्ती तथा राष्ट्र बैंकको मौद्रिक नीतिमा केही लचक भए लगानीकर्ताको मनोबल बढेमा बजारले गति लिनेमा ती ब्रोकर ढुक्क देखिए ।