वर्कशायर हाथवेको नगद ३ सय अर्ब डलर नाघ्यो, सेयर बाईब्याक शून्य

काठमाण्डौ । चर्चित अमेरिकी लगानीकर्ता वारेन बफेटको कम्पनी,वर्कशायर हाथवेको नगद मौज्जात ३ सय अर्ब डलर नाघेको छ । बफेटले सेयर रि पर्चेजको योजनाबाट पछि हट्दै सेयर बिक्री बढाएसँगै वर्कशायरको नगदमा उल्लेख्य वृद्धि भएको हो ।  

कम्पनीले हालै सार्वजनिक गरेको तेस्रो त्रैमासिक प्रतिवेदनअनुसार कम्पनीको नगद ३२५.२ अर्ब डलर पुगेको छ । दोस्रो त्रैमाससम्म भने कम्पनीसँग २७६.९ अर्ब डलरबराबरको नगद थियो ।  

कम्पनीले हालैमात्रै एप्पल र बैंक अफ अमेरिकाको ठूलो परिणाममा सेयर बिक्री गरेको थियो । कम्पनीले एप्पलको एक तिहाई हिस्सा बिक्री गरेको थियो । वर्काशायरले लगातार चौथो त्रैमासमा एप्पलमा सेयर बिक्री गरेको थियो ।  

यस्तै कम्पनीले बैंक अफ अमेरिकाको १० अर्ब डलरभन्दा बढीको सेयर बिक्री गरेको थियो । सेलिङ मुडमा रहेका ९४ वर्षिय बफेटले बिक्री बढाएसँगै तेस्रो त्रैमासमा वर्कशायरले ३६.१ अर्ब डलरबराबरको सेयर बिक्री गरेको छ । यो अवधिमा कम्पनीले कुनै पनि कम्पनीको सेयर रि पर्चेज गरेको छेन ।