निर्जीवन बीमा कम्पनीहरुको नाफा ८६.३०% ले घट्यो, इपीएस कुनको कति ?

काठमाण्डौ । निर्जीवन बीमा कम्पनीहरुको नाफा ८६.३० प्रतिशतले घट्न पुगेको छ । १४ निर्जीवन बीमकले चालु आवको पहिलो त्रैमाससम्म आर्जन गरेको खुद नाफा गत आवको सोही अवधिसम्मको तुलनामा ८६ प्रतिशतले घटेको देखिएको हो ।  

कम्पनीहरुले सार्वजनिक गरेको वित्तीय रिर्पोटअनुसार १४ निर्जीवन बीमकले कुल  १६ करोड ६५ लाख ८१ हजार रुपैयाँ नाफा कमाएका छन् । गत आवको यहि अवधिसम्म भने कम्पनीहरुले १ अर्ब २१ करोड ६० लाख रुपैयाँ नाफा कमाएका थिए ।  

असोज मसान्तसम्ममा ४ वटा निर्जीवन बीमा कम्पनीले घाटा ब्यहोरेका छन् भने नाफामा रहेका १० कम्पनीमध्ये पनि ४ वटा कम्पनीको नाफा गत आवको तुलनामा घट्न पुगेको छ । यसकारण समग्रमा निर्जीवन बीमा कम्पनीहरुको नाफा घटेको देखिएको हो ।  

गत असोज १० गतेदेखि १२ गतेसम्म आएको भीषण बाढीपहिरोका कारण ठूला–ठूला परियोजना तथा धनजनको क्षति भएको थियो । विशेषगरी निर्माणका कार्यहरु, हाइड्रो प्रोजेक्ट, घर तथा सवारी साधन जस्ता क्षेत्रमा उच्च क्षति पुगेको थियो । नेपाल बीमाा प्राधिकरणका अनुसार कात्तिक २८ गतेसम्ममा निर्जीवन बीमकहरुले ११ अर्ब रुपैयाँ भन्दा बढीको बीमा दाबी भुक्तानी गरिसकेका छन् । जुन यो असोज महिनामा परेको दाबीको भुक्तानी भएकाले कम्पनीहरुको पहिलो त्रैमासको वित्तीय विवरणमा नाफा प्रभावित देखिएको हो ।  

समिक्षा अवधिसम्ममा सर्वाधिक राष्ट्रिय बीमा कम्पनीले १५ करोड ६५ लाख रुपैयाँ नाफा कमाएको छ । कम्पनीको नाफा १३।७४ प्रतिशतले बढेको छ । गत आवको सोही अवधिसम्म आरबीसीएलले १३ करोड ७६ लाख रुपैयाँ नाफा कमाएको थियो ।  

यसका साथै शिखर इन्स्योरेन्सले ११ करोड ५२ लाख, नेको इन्स्योरेन्सले ७ करोड ४ लाख, हिमालयन एभरेष्टले ६ करोड ६१ लाख, सिद्धार्थ प्रिमियरले ६ करोड ४० लाख, आइजीआई प्रुडेन्सियलले ६ करोड १० लाख, प्रभुले ५ करोड ६० लाख, सानिमा जिआइसीले ५ करोड ८ लाख, एनएलजीले ४ करोड ८९ लाख रुपैयाँ र युनाइटेड अजोडले १ करोड ४ लाख रुपैयाँ नाफा कमाएका छन् ।  

यता उत्कृष्ट व्यवसाय गर्ने सगरमाथा लुम्बिनी इन्स्योरेन्सहित ४ वटा निर्जीवन बीमा कम्पनी भने घाटामा छन् । युनाइटेड अजोडले १ करोड ८१ लाख, सगरमाथा लुम्बिनीले ८ करोड ९५ लाख, नेशनलले १८ करोड ३ लाख र ओरियण्टलले २४ करोड ५१ लाख रुपैयाँ घाटा ब्यहोरेका छन् ।  

गत आवको तुलनामा सर्वाधिक नाफा बढाउनेमा भने सानिमा जिआइसी रहेको छ । कम्पनीले ५०.६० प्रतिशतले नाफा बढाएको छ । यता सर्वाधिक नाफा घट्नेमा भने नेपाल इन्स्योरेन्स रहेको छ । कम्पनीको नाफा ९२.८८ प्रतिशतले घट्न पुगेको छ ।  

ईपीएस कुनको कति ?  

निर्जीवन बीमा कम्पनीहरुको नाफा प्रभावित देखिएसँगै यता प्रतिसेयर आम्दानी (इपीएस)पनि प्रभावित देखिएको छ । १४ मध्ये दुई कम्पनीको इपीएस ऋणात्मक अवस्थामा रहेको छ भने ४ कम्पनीको इपीएस घटेको छ ।  

धितोपत्र दोस्रो बजारमा लगानी गर्नेहरुका लागि इपीएस सूचक महत्वपूर्ण हुन्छ । करपछिको नाफालाई कुल सेयर संख्याले भाग गर्दा आउने प्रतिफललाई नै प्रतिसेयर आम्दानी भनिन्छ । यो सूचकले कम्पनीको मुनाफा आर्जनको क्षमता देखाउने हुँदा कम्पनीको आधारभूत पक्षको विश्लेषणको प्रमुख सूचकको रुपमा लिइन्छ ।

सबैभन्दा बढी इपीएस राष्ट्रिय बीमा कम्पनीको ५८.७२ रुपैयाँ छ । कम्पनीको इपीएस गत आवको तुलनामा ७.०९ रुपैयाँले वृद्धि भएको छ । त्यस्तै, दोस्रोमा शिखरको १७.३६ रुपैयाँ र तेस्रोमा प्रभु इन्स्योरेन्सको १५.५४ रुपैयाँ छ ।  

यता नेको इन्स्योरेन्सको इपीएस १४.०१ रुपैयाँ हुँदा एनएलजीको इपीएस भने १२.७१ रुपैयाँ छ । साथै हिमालयन एभरेष्टको १०.५९ रुपैयाँ, सानिमा जिआइसीको १०.१७ रुपैयाँ, सिद्धार्थ प्रिमियरको ९.१२ रुपैयाँ, आइजीआई प्रुडेन्सियलको ८.०६ रुपैयाँ, नेपाल इन्स्योरेन्सको २.५३ रुपैयाँ छ ।  

युनाइटेड अजोड र सलिकोको इपीएस भने ऋणात्मक छ । सगरमाथा लुम्बिनीको इपीएस १३.६५ रुपैयाँ र यु्नाइटेड अजोडको ३.४६ रुपैयाँ ऋणात्मक छ ।  

चारवटा कम्पनीको इपीएस गत आवको तुलनामा घटेको छ । सर्वाधिक नेपाल इन्स्योरेन्सको ३६.५९ रुपैयाँ घटेको छ भने सिद्धार्थ प्रिमियरको १०.५४ रुपैयाँले घटेको छ ।