नेप्सेमा दोहोरो अंकको गिरावट, जानकार भन्छन्, ‘शक्ति सञ्चय गर्दै बजार’

काठमाण्डौ । साताको पहिलो कारोबार दिन आज पनि नेपाल स्टक एक्सचेञ्च(नेप्से) मा दोहोरो अंकको गिरावट आएको छ । आज नेप्से परिसूचक ०.४८ प्रतिशत अर्थात १३.०३ अंकले घटेर २ हजार ६६७.४० विन्दुमा झरेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३७ प्रतिशतले बढेर ४७१.२० विन्दुमा सीमित बनेको छ । यो दिन नेप्सेमा सूचीकृत मध्ये ३२२ वटा स्क्रिप्टको १ करोड ५२ लाख ७० हजार १९७ कित्ता सेयर ७ अर्ब ७२ करोड ८८ लाख रुपैयाँभन्दा बढीको कारोबार भएको  छ ।

आजको बजारबारे अर्थशास्त्री सूर्यनारायण पौडेल भन्छन्,  ‘लगानीकर्तामा आत्मबल नबढ्दा आज बजार घटेको हो । अहिले देशमा केही राजनीतिक अन्यौलताका कारण समेत बजार घट्न पुगेको देखिन्छ । नेप्सेले स्टक डिलरका लागि धितोपत्र कारोबार गर्न योग्य कम्पनीको सूची सार्वजनिक गरेकोमा लगानीकर्तामा अन्यौलता भएको कारण समेत बजारमा दबाब आएको छ । यद्यपी अहिले पनि बजार बुलिस ट्रेण्डमै रहेको छ ।’  

पौडेलले बजार २६ सयदेखि २७८० सम्म साइडवेज चलेको देखिएको बताए । उनका अनुसार यो भनेको बजारले शक्ति सञ्चय गरेको हो । ‘यस कारण लगानीकर्ताले डर र लोभलाई नियन्त्रण गर्नुपर्ने हुन्छ,’उनले भने ।  

अर्का बजार जानकार विरेन्द्र विष्ट भन्छन्, लगानीकर्ताले मौद्रिक नीतिको समीक्षा कुर्दा बजार खासै उत्साह देखिएको छैन । अब गभर्नरको कार्यकाल समेत सकिदै गर्दा मौद्रिक नीतिको समीक्षा सकारात्मक नै आउने अपेक्षा गर्न सकिन्छ । ’

विशेष गरी अहिले सरकार परिवर्तन हुने डरले बजारमा सोचे अनुरुप उत्साह नदेखिएको उनले बताए ।  

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो । आज लगानी समूह ०.०८ प्रतिशत र उत्पादन तथा प्रशोधन समूह ०.६८ प्रतिशतले बढ््यो ।  

आज विकास बैंक समूहमा सर्वाधिक गिरावट आयो । यो समूह आज १.६३ प्रतिशतले घट्यो । यस्तै बैंकिङ समूह ०.५४, वित्त ०.३७, होटल ०.४९,हाईड्रो ०.४१, जीवन बीमा ०.५५,लघुवित्त ०.९४, म्युचुाल फण्ड ०.१२,निर्जीवन बीमा,०.१७,अन्य ०.७१ र व्यापार समूह ०.०७ प्रतिशतले घट्यो ।  

धेरै कारोबार गर्ने कम्पनीहरु

यो दिन जानकी फाइनान्सको सर्वाधिक सेयर कारोबार भयो । आज यो कम्पनीको ६० करोड ८७ लाख बढीको कारोबार भयो । एनआरएन इन्फ्रास्ट्रक्चरको आज ४० करोड ३३ लाख,ङादी ग्रुप पावरको ३६ करोड ३३ लाख,वेष्ट फाइनान्सको २३ करोड ९८ लाख,रसुवागढी हाईड्रोको १८ करोड ५४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा सकारात्मक सर्किट लाग्यो । आज थ्रि–स्टार हाईड्रो र ङादी ग्रुप पावरको सेयरमूल्यमा अपर सर्किट लाग्यो ।  

यस्तै जानकी फाइनान्सको ८.०७ प्रतिशत,एनआरएन इन्फ्रास्ट्रक्चर ६.६१ र सामुदायिक लघुवित्तको सेयर ६.६० प्रतिशतले बढ्यो ।

महुली लघुवित्तको सेयरमूल्य आज सर्वाधिक अर्थात ६.३० प्रतिशतले घट्यो । नारायणी डेभलपमेन्ट बैंकको सेयरमूल्य पनि आज ५.६० प्रतिशत र नेपाल फाइनान्सको सेयरमूल्य ५.३४ प्रतिशतले घट्यो ।