लगातार ४ दिन घट्यो नेप्से, ‘संस्थागत लगानीकर्ता अझै पर्ख र हेरको अवस्थामा’

काठमाण्डौ । साताको दोस्रो कारोबार दिन आज पनि नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.४७ प्रतिशत अर्थात १२.८७ अंकले घटेर २ हजार ६७६.१२ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२९ प्रतिशतले घटेर ४५५.७१ विन्दुमा झरेको छ । यो दिन नेप्सेमा सूचीकृत मध्ये ३१७ वटा स्क्रिप्टको १ करोड १५ लाख २३ हजार ३ कित्ता सेयर ५ अर्ब ६२ करोड ९९ लाख रुपैयाँभन्दा बढीको कारोबार भएको  छ ।

यससँगै नेप्सले लगातार ४ दिन घटेको छ ।  

आजको बजारबारे बजार जानकार अजयसिंह थापा(जयशम्भु) भन्छन्,  ‘अर्थतन्त्रमा खासै सुधार नदेखिएको र कम्पनीहरुको लाभांश क्षमता बढ्न नसक्दा पछिल्लो समय बजारले गति लिन सकिहरहेको छैन । यसका साथै हकप्रद तथा प्राथमिक सेयरको सप्लाई बढ्ने सम्भावनाका कारण समेत बजारमा दबाब परेको छ ।’

थापाका अनुसार प्राविधिक रुपमा आइतबारको कारोबाले ट्रेण्डलाई ब्रेक डाउन भएका कारण बजारको माथिको सम्भावना कमजोर देखिएको छ ।    

अर्का बजार जानकार दामोदर गजुरेलले आज सपोर्ट जोनबाट बजार फर्किएका कारण बजार २६६० माथि रहुँन्जेल मजबुत नै रहेको बताए । ‘आधारभूत रुपमा बैंक तथा वित्तीय संस्थाको रिपोर्ट कमजोर आउनु र जलविद्युत कम्पनीहरुको लक–इन अवधि सकिदै जानुका कारण बजारले गति लिन सकेको छैन । संस्थागत लगानीकर्ता पनि पर्ख र हेरको अवस्था मै रहेका छन् । ’

यद्यपी बढ्दो तरलता र घट्दो ब्याजदरका कारण डिसेम्बर महिनामा एउटा बढोत्तरी आउन सक्ने उनले बताए ।  

यो दिन नेप्सेमा सूचीकृत १३ वटा समूहमध्ये ५ वटामा हरियाली छायो भने अन्य ८ वटा समूहमा रातो पोतियो । आज उत्पादन तथा प्रशोधन समूह सर्वाधिक अर्थात १.०६ प्रतिशतले बढ्यो । यस्तै वित्त समूह ०.१५ प्रतिशत,लगानी ०.७६,म्युचुअल फण्ड ०.१४ र अन्य समूह ०.११ प्रतिशतले बढ्यो ।  

जीवन बीमा समूह आज सर्वाधिक घट्यो । यो समूह आज १.६७ प्रतिशतले घट्यो । यस्तै बैंकिङ समूह ०.४६ प्रतिशत, विकास बैंक ०.६८,होटल ०.८३,हाईड्रो ०.५४,लघुवित्त ०.६१ र व्यापार समूह १.३० प्रतिशतले घट्यो ।  

धेरै कारोबार गर्ने कम्पनीहरु

यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको ३५ करोड २७ लाख बढीको कारोबार भयो । हिमालयन डिष्टिलरीको आज २७ करोड ९१ लाख,जोशी हाईड्रोको १२ करोड ४६ लाख, जानकी फाइनान्सको ११ करोड १७ लाख र एलआईसी नेपालको १० करोड ३५ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागेन । आज इमिर्जिङ नेपालको सेयरमूल्य सर्वाधिक अर्थात ८.७६ प्रतिशतले बढ्यो । मिथिला लघुवित्तको सेयरमूल्य पनि आज ७.१४ प्रतिशत,एनआरएन इन्फ्रास्ट्रक्चरको ६.०३ र हिमालयन डिष्टिलरीको सेयरमूल्य ५.९९ प्रतिशतले बढ्यो ।  

स्वाभिमान लघुवित्त आज सर्वाधिक कमाउने कम्पनीको रुपमा रह्यो । यो कम्पनीको सेयरमूल्य १० प्रतिशतले ओरालो लाग्दा खानीखोला हाईड्रोको ८.२१ प्रतिशत र एलआईसी नेपालको सेयरमूल्य ७.२५ प्रतिशतले घट्यो ।