कोटेश्वरको भाटभटेनीमा राजावादीको तोडफोड, भवन क्षतिग्रस्त

काठमाण्डौ । राजावादी प्रदर्शनकारीहरुले व्यक्तिका निजी सम्पत्तिमाथि तोडफोडलाई व्यापक बनाएका पाइएको छ । व्यक्तिका निजी घर, रेष्टुराँ, मिडियाहाउसदेखि लिएर सुपरमार्केटसम्म पनि राजावादीको निशानामा परे ।  

विशेष गरी राजावादीहरुले प्रधानमन्त्री तथा नेकपा एमालेका अध्यक्ष केपी शर्मा ओलीको रीस उनीसँग विगतका कुनै न कुनै कोणबाट जोडिएका वा निकट मानिएकाहरुविरुद्ध तोडफोड गरी पोखेका देखिएको छ । 

सो क्रममा नेकपा एमालेको केन्द्रीय पार्टी कार्यालयका लागि जग्गा र भवन गरी करिब १ अर्बको सहयोग घोषणा गरेका व्यवसायी मीनबहादुर गुरुङबाट सञ्चालित भाटभटेनीलाई समेत प्रदर्शनकारीले तारोमा पारे ।  

काठमाण्डौको तीनकुनेबाट प्रहरीले लखेटेका प्रदर्शनकारीहरु कोटेश्वरस्थित भाटभटेनीमा पुगेर तोडफोड गर्र्दै सामाज बाहिर निकालेर आगजनीमा समेत उत्रिए ।  

प्रदर्शनकारीको ढुंगामूडाबाट भाटभटेनीको कोटेश्वरस्थित आउटलेट क्षतिग्रस्त बनेको छ । भवनका सिसाहरु समेत फूटेका छन् । 

भाटभटेनीका कर्मचारीकाअनुसार सुरक्षागार्डलाई धकेलेर सुपरस्टोरभित्र छिरेका प्रदर्शनकारीहरुले तरकारी र सामानहरु बाहिर फ्याकेर नष्ट गरिदिएका थिए ।  

भाटभटेनी सुपरमार्केटले घटनालगत्तै प्रहरीलाई खबर गरे पनि सुरक्षा नपाइएको गुनासो गरेको छ ।