४९.९९ लाखदेखि स्काईवेलको डेलिभरी सुरु

काठमाण्डौ । एलआरआर मोटर्सले चिनियाँ लक्जरी विद्युतीय सवारी ब्राण्ड ‘स्काईवेल’को नेपालमा डेलिभरी सुरु गरेको छ ।

कम्पनीले ‘नाडा अटो शो २०२६’मा प्राप्त बुकिङका आधारमा स्काईवेल ईभी ग्राहकलाई हस्तान्तरण गर्न थालेको जनाएको छ ।

एलआरआर मोटर्सले नाडा अटो शोमा स्काईवेलको बीई११ मोडल सार्वजनिक गरेको थियो । कम्पनीका अनुसार अटो शो अवधिमा मात्रै करिब ४ सय युनिट गाडी बुकिङ भएका थिए ।

अटो शोका साथै त्यसपछि बुकिङ गर्ने ग्राहकलाई समेत क्रमशः गाडी डेलिभरी गर्न सुरु गरिएको कम्पनीले जनाएको छ । बुकिङअनुसार उत्पादक कम्पनीबाट गाडी आयात भइरहेको र चरणबद्ध रुपमा ग्राहकलाई हस्तान्तरण गरिने कम्पनीको भनाइ छ ।

नेपालमा स्काईवेल बीई११ विभिन्न भेरियन्टमा उपलब्ध छ । ४१० किलोमिटर रेन्ज दिने इन्ट्री भेरियन्टको मूल्य ४९ लाख ९९ हजार रुपैयाँ तोकिएको छ ।

यस्तै ४१० किलोमिटर रेन्जकै कम्फर्ट भेरियन्टको मूल्य ५५ लाख ९९ हजार रुपैयाँ र लक्जरी भेरियन्टको मूल्य ५६ लाख ९९ हजार रुपैयाँ कायम गरिएको छ ।

५२० किलोमिटर रेन्ज दिने भेरियन्टको मूल्य भने ६४ लाख ९९ हजार रुपैयाँ तोकिएको कम्पनीले जनाएको छ ।