युट्युबले अमेरिकामा लागेको आगलागीबाट प्रभावित कन्टेन्ट क्रियटरलाई १५ मिलियन डलर दिने

काठमाण्डौ । गूगल र युट्युबले अमेरिकामा लागेको आगलागीबाट प्रभावित समुदाय र कन्टेन्ट क्रियटरलाई १५ मिलियन डलर सहयोग गर्ने भएको छ । युट्युबका सीईओ निल मोहनले बुधबार आफ्नो ब्लग पोष्टमार्फत यसबारे जानकारी दिएका हुन् ।  

उक्त सहयोग लस एन्जलसका सहयता तथा उद्धारमा संलग्न स्थानिय संघ–संस्थालाई प्रदान गरिनेछ । लस एन्जलसमा रहेको कम्पनीको कार्यालय पुनःखुलेसँगै आगलागीबाट प्रभावित कन्टेन्ट क्रियटरले समेत सहायता पाउनेछन् । उनीहरुले आफ्नो व्यवसायलाई पुनर्स्थापना र पुनर्संरचना गर्न तथा सामुदायिक कार्य गर्नका लागि युट्युबको प्रोडक्सन फ्यासिलिटी उपयोग गर्न सक्नेछन् ।  

गूगलका सीईओ सुन्दर पिचाईले एक्समा पोष्ट गरेका छन्, ‘हाम्रा सबै कर्मचारी,युट्युब क्रियटर समुदाय र लस एन्जलसमा रहेका सबैजना सुरक्षित रहनुहोला । हामी तपाईहरुलाई सहयोग गर्न तत्पर छौं ।’

अमेरिकामा टिकटक बन्द हुने भएसँगै कन्टेन्ट टिकटकका कन्टेन्ट क्रियटरहरुले आफूहरुलाई अन्य सामाजिक सञ्जालहरुमा फलो गर्न आग्रह गरिरहेका बेला गूगल र युट्युबले यस्तो निर्णय गरेका हुन् । छोटो अवधिको भिडियो अपलोड गर्ने प्लेटफर्म,युट्युट सट्स्,  मेटा,रेडनोट र इन्स्टा रिल टिकटकको प्रतिष्पर्धि हुन् ।