मस्कले एकैदिन गुमाए २९ अर्ब डलर, टेस्लाको सेयरमूल्यमा पहिरो

काठमाण्डौ । विश्वकै धनाढ्य व्यक्ति एलन मस्कको सम्पत्ति एकैदिन २९ अर्ब डलरले घटेको छ । ईभी अटो निर्माता कम्पनी टेस्लाको सेयरमूल्यमा आएको गिरावटका कारण मस्कले सोमबार अर्बौ डलर गुमाएका हुन् ।  

ब्लूमबर्ग बिलिनियर्स इन्डेक्सका अनुसार मार्च ११ सम्म मस्कको सम्पत्ति ३०१ बिलियन डलर रहेको छ । विगत एक वर्षको अवधिमा मस्कको सम्पत्ति १३२ अर्ब डलरले घटिसकेको ब्लूमबर्गले जनाएको छ ।  

सम्पत्तिमा आएको व्यापक गिरावटका बाबजुत मस्क अmभैपनि विश्वको धनाढ्यको सूचीमा शीर्ष स्थानमा यथावत् छन् ।  

मस्कपछि विश्वको दोस्रो धनाढ्यको सूचीमा अमेजनका संस्थापक जेफ बेजोस छन् । उनको कुल सम्पत्ति २१६ अर्ब डलर रहेको छ । यसरी मस्क र बेजोसको सम्पत्तिमा ८५ अर्ब डलरको भिन्नता छ ।  

सोमबार टेस्लाको सेयरमूल्य १५ प्रतिशतले घटेको छ । यो गिरावटसँगै टेस्लाको सेयरमूल्य २२२.१५ डलरमा सीमित बनेको छ । कम्पनीको बिक्रीमा देखिएको सुस्तताका कारण लगानीकर्ता आत्तिएसँगै कम्पनीको सेयरमूल्यमा उच्च गिरावट आएको जनाइएको छ ।

टेस्लाले यतिबेला विश्वको सबैभन्दा ठूलो ईभी बजार चीनमा संघर्ष गरिरहेको छ । कम्पनीलाई चीनको स्थानिय कम्पनी बीवाईडीले कडा टक्कर दिईरहेको छ । फेब्रुअरीमा कम्पनीको साङघाई कारखानाको आपूर्ति ४९ प्रतिशतले घटेको छ । फेब्रुअरीमा यो कारखानाबाट ३० हजार ६८८ युनिट मात्रै सवारी आपूर्ति भएको छ । जुन सन् २०२२ जुलाई पछिकै न्यून मासिक आपूर्ति हो ।