यी हुन् सन् २०२५ मा तीव्र वृद्धि भईरहेका अर्थतन्त्र, भुटान एशियाकै दोस्रो स्थानमा

काठमाण्डौ । हालसम्मको अवस्थालाई विश्लेषण गर्दा सन् २०२५ विश्व अर्थतन्त्रका लागि खासै उपलिब्धपूर्ण हुने देखिदैन । अमेरिकाले आक्रामक रुपमा लगाईरहेको ट्यारिफका कारण विश्व व्यापार युद्ध नजिकिएको छ । यसले विश्वका देशहरुको अर्थतन्त्रमा सुस्तता छाउने निश्चित प्रायःछ ।  

वस्तु तथा सेवाको प्रवाह अवरुद्ध हुँदा विश्वका अर्थतन्त्रहरुलाई आर्थिक वृद्धिको लक्ष्य हासिल गर्न कठिनाई हुने देखिन्छ । तर यसबीचमा पनि विश्वका केही अर्थतन्त्रहरुले भने लोभलाग्दो आर्थिक वृद्धि हासिल गरिरहेका छन् । भिजुअल क्यापिटलिस्टले सन् २०२५ का सर्वाधिक वृद्धि भईरहेका अर्थतन्त्रहरुको सूची सार्वजनिक गरेको छ । जसमा अधिकांश तेल उत्पादक देशहरु रहेका छन् । कुल २० वटा देशहरुमा १२ वटा अफ्रिकी र ६ वटा एशियाली देशहरु रहेका छन् ।  

भिजुअल क्यापिटलिस्टका अनुसार दक्षिण सुडान सूचीको शीर्ष स्थानमा रहेको छ । सन् २०२५ मा दक्षिण सुडानको वास्तविक जीडीपी ग्राथ २७.२ प्रतिशत हुने अनुमान गरिएको छ । गृहयुद्धका कारण पछिल्लो समय दक्षिण सुडानको जीडीपी उतारचढावपूर्ण रहेको छ । यसले यहाँका अधिकांश जनतालाई गरिबीतर्फ धकेलेको छ । भूपरिवेष्ठित यो  राष्ट्रको अर्थतन्त्र यहाँ भएर छिमेकी मुलुक सुडान जाने पाइपलाइनमा समेत निर्भर रहेको छ ।  

सन् २०२४ मा दक्षिण सुडानमा महत्वपूर्ण पाइपलाइनहरु निर्माण भएका छन् । जसले सरकारको आम्दानी ह्वात्तै बढाएको छ । तर गृहयुद्धका कारण पाइलाइनको मर्मत कठिन देखिन्छ ।

यस्तै सूचीको दोस्रो स्थानमा गुयाना रहेको छ । दक्षिण अमेरिकी यो देश कुनै समय यो क्षेत्रकै गरिब देशको सूचीमा पर्ने गर्थ्यो । तर सन् २०१५ मा तेलका ठूला खानी फेला परेसँगै यो देशको अवस्था फेरिएको छ । सन् २०१९ बाट तेल उत्खनन भएसँगै गुयानाले अर्बौ डलर आर्जन गरिसकेको छ ।  

यो रकम यहाँको सरकारले पूर्वाधार विकासमा लगानी गरिरहेको छ । विश्लेषकहरुले सन् २०४० सम्म गुयानाको कुल तेल आम्दानी १५७ अर्ब डलर पुग्ने अनुमान गरेका छन् । सन् २०२५ मा यहाँको जीडीपी वृद्धि १४.४ प्रतिशत रहने अनुमान गरिएको छ । 

चौथौ स्थानमा सेनेगल रहेको छ । यहाँको जीडीपी ग्रोथ ९.३ प्रतिशत रहने अपेक्षा गरिएको छ ।  

यस्तै पालाउको जीडीपी ग्रोथ ८.५ प्रतिशत, सुडानको ८.३ प्रतिशत,युगान्डाको ७.५ प्रतिशत, नाइजरको ७.३ प्रतिशत,मकाओको ७.३, भुटानको ७.२ प्रतिशत,मंगोलियाको ७ प्रतिशत,जाम्बियाको ७ प्रतिशत,बेनिनको ६.५ प्रतिशत,इथियोपियाको ६.५ प्रतिशत,रुवान्डाको ६.५ प्रतिशत,इण्डियाको ६.५ प्रतिशत,आईभरी कोस्टको ६.४ प्रतिशत,फिलिपिन्सको ६.१ प्रतिशत,भियतनामको ६.१ प्रतिशत र डिजीबाउटीको ६ प्रतिशत हुने जनाइएको छ  

यस्तै यो वर्ष समग्र विश्वको आर्थिक वृद्धिदर भने ३.२ प्रतिशत रहनेछ ।