सुलभ अग्रवालसहित ३ जनालाई ७ दिने अल्टिमेटम, कामाख्या फिनकोर्पको सेयर मूल्यवृद्धिमाथि प्रश्न

काठमाडौं। कम्पनी रजिष्ट्रारको कार्यालयले कामाख्या फिनकोर्प प्रालिका तत्कालीन सञ्चालक सुलभ अग्रवाल र सुभी अग्रवालसहित तीन जनालाई ७ दिने म्याद सूचना जारी गरेको छ।

उच्च अदालत पाटनबाट मुद्दा नं। ०८१–डीपी–२२१० मा आवश्यक प्रमाण बुझी सम्बन्धित पक्षलाई सुनुवाइको अवसर दिएर कानुनबमोजिम निर्णय गर्न मिसिल फिर्ता आएपछि कार्यालयले पुनः सूचना जारी गरेको हो।

कार्यालयले कामाख्या फिनकोर्पको २०७८ वैशाख ३१ गते प्रतिसेयर १०० रुपैयाँ रहेको मूल्य असार १७ गतेसम्म ८०० रुपैयाँ पुग्नुको आधार र कारणबारे प्रमाण मागेको छ। साथै, हिमालयन रिइन्स्योरेन्स लिमिटेडको सेयर जफत तथा हस्तान्तरण प्रक्रिया कम्पनीको प्रबन्धपत्र, नियमावली र कम्पनी ऐन, २०६३ अनुसार भए/नभएको विषयमा पनि प्रमाण बुझ्ने प्रक्रिया अघि बढाइएको छ।

यसअघि हुलाकमार्फत रजिष्ट्री गरी पठाइएको म्यादको जवाफ नआएपछि सार्वजनिक सूचना जारी गरिएको कार्यालयले जनाएको छ। सूचना प्रकाशित भएको मितिले ७ दिनभित्र लिखित प्रतिक्रिया तथा प्रमाणसहित उपस्थित हुन कार्यालयले आग्रह गरेको छ।

तोकिएको अवधिमा उपस्थित नभए कानुनबमोजिम निर्णय गरिने र त्यसपछि उक्त विषयमा उजुर–बाजुर गर्न नपाइने सूचनामा उल्लेख छ।