‘ब्रिटेन अब नरक बनिसक्यो’ भन्दै अरबपति फ्रेडरिकसनले बेच्दै छन् ४८०० करोडको घर, धनाढ्यको बढ्दो पलायनले अर्थतन्त्र प्रभावित हुने चिन्ता

लण्डन ।  ब्रिटेनका नवौं सबैभन्दा धनी व्यक्ति मानिने चर्चित नर्वेजियन मूलका व्यापारी जॉन फ्रेडरिकसनले आफ्नो भव्य लन्डनस्थित घर बिक्रीमा राखेका छन्। करिब ४८०० करोड रुपैयाँ (३३.७ करोड डलर) मूल्यको ‘द ओल्ड रेक्टोरी’ नामक यो घर उनले अब यूएई (दुबई) सरेपछि बिक्रीमा राख्ने निर्णय गरेका हुन्।

८१ वर्षीय फ्रेडरिकसनले खुलेरै भनेका छन्, “ब्रिटेन नरक बनिसकेको छ।” उनले यो टिप्पणी ब्रिटेन सरकारले गैर-डोमिसाइल (Non-Domicile) कर प्रणाली हटाउने निर्णयपछि गरेका हुन्, जसले विदेशी आम्दानीमा ब्रिटेनमा कर तिर्नु नपर्ने सुविधा दिन्थ्यो।

ब्रिटेनको तेस्रो ठूलो निजी निवास

‘द ओल्ड रेक्टोरी’ ब्रिटेनकै सबैभन्दा महँगो निजी आवासहरूमध्ये एक हो। ३० हजार वर्गफुटमा फैलिएको यो ३०० वर्ष पुरानो घरमा १० वटा शयनकक्ष, २ एकडको बगैंचा र शानदार बॉलरूम छ। यो बकिंघम प्यालेसपछि ब्रिटेनको तेस्रो ठूलो निजी घर मानिन्छ।

२००१ देखि यूकेमा स्थायी बसोबास

फ्रेडरिकसनले सन् २००१ मा उक्त सम्पत्ति किनेका थिए र त्यसबेलादेखि उक्त घर उनको बेलायतस्थित मुख्य निवास थियो। उनमा पहिले नर्वे र पछिल्लो समय साइप्रसको नागरिकता थियो। तर, हालै उनले युएई बसाइँ सरेका छन् र आफ्ना धेरै व्यवसाय पनि त्यहीँ सारिसकेका छन्।

ब्रिटेनको कर नीति र धनाढ्यहरूको पलायन

ब्रिटेनका नयाँ अर्थमन्त्री राहेल रीव्सले हालै गरेको आर्थिक नीतिहरूको विरोध स्वरूप फ्रेडरिकसनले यस्तो कदम चालेका हुन्। गैर-डोमिसाइल कर प्रणाली अन्त्य गर्ने निर्णयले विशेषगरी विदेशबाट आम्दानी गर्ने धनाढ्यहरूलाई ब्रिटेनमा कर तिर्न बाध्य बनाएको छ।

फ्रेडरिकसनको भनाइ छ, “ब्रिटेन अहिलेको नीतिका कारण नर्वेजस्तो हुन थालेको छ, जुन ठाउँ म जति सक्दो टाढा रहन चाहन्छु।”

घरेलु कर्मचारी हटाउँदै, निजी बिक्रीको तयारी

The Times को रिपोर्ट अनुसार, फ्रेडरिकसनले आफ्ना एक दर्जनभन्दा बढी घरेलु कर्मचारी हटाइसकेका छन् र अब उक्त सम्पत्तिको निजी रूपमा ‘अफ-मार्केट’ बिक्रीका लागि तयारी गर्दै छन्।

धनाढ्यहरूको बसाइँसराइ बढ्दो

फ्रेडरिकसन मात्र होइन, कर प्रणाली कडाइसँगै ब्रिटेनमा धनाढ्य व्यक्तिहरूको पलायन बढ्दो छ। विशेषज्ञहरूका अनुसार, करको दबाब र लगानीमैत्री वातावरणको अभावका कारण धेरै धनी व्यक्तिहरू युएई, सिंगापुर वा स्वीट्जरल्यान्ड जस्ता करमैत्री देशमा सर्न थालेका छन्।

यसरी सम्पन्न वर्गको पलायनले ब्रिटेनको अर्थतन्त्रमा दीर्घकालीन नकारात्मक असर पार्ने चिन्ता गरिएको छ, किनभने धनाढ्यसँगै उनीहरूको लगानी, व्यवसाय र पूँजी पनि बाहिरिन सक्छ।

-Agencies