देशभर रास्वपाको जबरजस्त लहर, बालेनकै स्वकीय सचिव भने पराजयको संघारमा

काठमाण्डौ । राष्ट्रिय स्वतन्त्र पार्टी(रास्वपा)को देशभर जबरजस्त लहर छ । यहीकारण प्रतिनिधिसभा सदस्य निर्वाचनमा रास्वपा दुईतिहाई बहुमत नजिक पुगेको छ ।  

रास्वपाले यो पटकको निर्वाचनमा ऐतिहासिक जित निकालिसकेको छ । एमाले, कांगे्रस, माओवादी, मधेशवादीजस्ता परम्परागत राजनीतिक शक्तिहरुका वर्षौदेखिका किल्ला रास्वपाको पक्षमा आएको जनमतको सुनामीले तहसनहस बनाइदिएको छ । 

कतिपय क्षेत्रमा उठेर चुनाव जितेका रास्वपाको उम्मेद्वारहरुको अनुहार हेर्दा त्यहाँ जुनसुकै पात्र उठेको भए पनि जित्थ्यो भन्ने धेरैलाई लागेको छ र यथार्थ पनि त्यस्तै नै छ । उदाहरणका लागि मधेशको एक सिटमा उम्मेद्वारी खारेजीमा परेका रास्वपाका उम्मेद्वारको पक्षमा प्रचण्ड बहुमत आएको छ ।  

यसरी हेर्दा रास्वपाको ऐतिहासिक आँधीहुरी र जनमतको सुनामी आएकै बेला भावी प्रधानमन्त्रीको रुपमा रास्वपाको पक्षमा जबरजस्त माहौल तयार गरेका सो दलका वरिष्ठ नेता बालेन शाहलाई भने झट्का लाग्ने अवस्था सिर्जना भएको छ ।  

काठमाण्डौ महानगरपालिकाको मेयरको चुनावी दौडदेखि नै बालेनको दाहिने हात भएर काम गरेका तथा मेयर भइसकेपछि समेत स्वकीय सचिव तथा सल्लाहकारको रुपमा सक्रिय भूपदेव शाह भने पराजको संघारमा छन् । 

भूपदेव शाह यसपटकको संसदीय निर्वाचनमा अछाम २ बाट उठेका थिए । तर, हालसम्म प्राप्त नतिजा अनुसार उनी चौथो स्थानमा देखिएका छन् ।  

सो स्थानमा एमालेका यज्ञबहादुर बोगटीले ८ हजार ४७३ मतसहित अग्रता लिइरहेका छन् ।  

दोश्रो स्थानमा रहेका नेपाली कांग्रेसका पुष्पबहादुर शाहले ८ हजार १०५ मत पाएका छन् ।  

तेश्रो स्थानमा रहेका नेकपाका उम्मेद्वार बलबहादुर कुँवरले ४ हजार ७१२ मत पाएका छन ।  

रास्वपाको उम्मेद्वारको रुपमा चुनावमा होमिएका भूपदेवको भने ४ हजार ३५४ मत मात्रै आएको छ ।