सेयर बजारमा नयाँ सर्किट नियम: ५% मा ब्रेक, ८% मा दिनभर बन्द

काठमाण्डौ । नेपाली सेयर बजारमा अत्यधिक उतारचढाव नियन्त्रण गर्न सर्किट ब्रेकरसम्बन्धी नियममा फेरबदल गरिएको छ। नयाँ व्यवस्थाअनुसार अब नेपाल स्टक एक्सचेन्ज (नेप्से) सूचक ५ प्रतिशतले घटबढ हुँदा पहिलो सर्किट ब्रेक लाग्नेछ भने ८ प्रतिशतसम्म पुगेमा सो दिनको कारोबार पूर्ण रूपमा बन्द गरिनेछ।

यो परिवर्तन नेपाल धितोपत्र बोर्ड (सेबोन) ले धितोपत्र कारोबार विनियमावली संशोधनमार्फत लागू गरेको हो। नेप्सेको प्रस्तावलाई सेबोनको सञ्चालक समितिले स्वीकृति दिएपछि नयाँ व्यवस्था कार्यान्वयनको चरणमा पुगेको हो।

संशोधित प्रावधानअनुसार, बजार खुलेको पहिलो घण्टाभित्रै सूचक ५ प्रतिशत तलमाथि भएमा २० मिनेटका लागि कारोबार रोकिनेछ। यदि सोही दिन सूचक ८ प्रतिशतसम्म उकालो वा ओरालो लागेमा भने बाँकी समयका लागि बजार नै बन्द गरिने व्यवस्था गरिएको छ।

यसअघि भने ४ प्रतिशतमा पहिलो ब्रेक, ५ प्रतिशतमा लामो समयका लागि दोस्रो ब्रेक र ६ प्रतिशतमा पूरै दिन कारोबार रोकिने नियम थियो। नयाँ संरचनाले अघिल्लोभन्दा केही फराकिलो दायरा दिँदै बजारलाई बढी लचिलो बनाउने प्रयास गरिएको देखिन्छ।

नियामक निकायका अनुसार यो कदमले अनावश्यक रूपमा बारम्बार कारोबार रोकिने अवस्था घटाउने, लगानीकर्तामा विश्वास कायम राख्ने र बजारलाई व्यवस्थित बनाउने लक्ष्य राखिएको छ।

नेप्सेले पनि यो सुधारलाई बजारको स्थायित्व मजबुत बनाउने र लगानीकर्ताको सहभागिता बढाउने उपायका रूपमा अघि सारेको जनाएको छ।

नयाँ सर्किट ब्रेकर प्रणाली छिट्टै कार्यान्वयनमा आउने तयारीमा रहेको छ। यससँगै नेपाली पुँजीबजारमा स्थिरता र विश्वास थप सुदृढ हुने अपेक्षा गरिएको छ।