अण्डाको उत्पादन घट्दा मूल्य वृद्धि

काठमाण्डौ । देशभर अण्डाको उत्पादनमा कमी र मागमा वृद्धि भएपछि अण्डाको मूल्य पुनः बढाइएको छ। लेयर्स कुखुरापालक संघले फार्म मूल्य समायोजन गर्दै आजदेखि लागू हुनेगरी नयाँ दर निर्धारण गरेको हो।

संघका अनुसार ठूलो अण्डाको फार्म मूल्य प्रति क्रेट रु ४६५ कायम गरिएको छ, जुन यसअघिको रु ४५० भन्दा रु १५ ले बढी हो। त्यस्तै, मझौला अण्डाको मूल्य रु ४१५ निर्धारण गरिएको छ, जुन अघिल्लो रु ४०० भन्दा रु १५ ले वृद्धि हो।

उत्पादनमा आएको कमीका मुख्य कारणहरूमा कुखुरामा फैलिएको रोग र बढ्दो गर्मीलाई लिइएको छ। उच्च तापक्रमका कारण कुखुरामा पर्ने ‘हीट स्ट्रेस’ ले अण्डा उत्पादनमा प्रत्यक्ष असर परेको किसानहरू बताउँछन्। उता, नयाँ वर्षको पूर्वसन्ध्यादेखि बढेको पर्यटकीय चहलपहल र बजारमा खपत वृद्धि हुँदा अण्डाको माग उल्लेख्य रूपमा बढेको छ। साथै, सीमावर्ती क्षेत्रमा कडाइ गरिएकाले बाहिरबाट अण्डा आयात घट्दा आन्तरिक बजारमा दबाब बढेको छ।

यद्यपि मूल्य वृद्धि भए पनि किसानहरू अझै लागत मूल्यभन्दा तल रहेको बताइएको छ। सङ्घका अध्यक्ष विनोद पोखरेलका अनुसार प्रति अण्डा उत्पादन लागत करिब रु १९.१२ पर्छ, जसअनुसार प्रति क्रेट लागत झन्डै रु ५७४ पुग्छ। हालको बिक्री मूल्य सो लागतभन्दा कम रहेकाले किसानहरू अपेक्षित नाफा लिन सकेका छैनन्।

गत मङ्सिरमा अण्डाको मूल्य हालसम्मकै उच्च बिन्दुमा पुगेको थियो, जहाँ ठूलो अण्डा प्रति क्रेट रु ५६५ र मझौला अण्डा रु ५५० मा कारोबार भएको थियो। त्यसयता मूल्य घट्दै आएकोमा हाल पुनः वृद्धि गरिएको हो।