एमालेद्वारा गृहमन्त्री गुरुङको राजीनामा माग

काठमाण्डौ । नेकपा (एमाले) ले गृहमन्त्री सुधन गुरुङको राजीनामा माग गरेको छ । पार्टीले एक विज्ञप्ति जारी गर्दै गृहमन्त्रीसँग सम्बन्धित विषयहरुमा निष्पक्ष र स्वतन्त्र अनुसन्धान प्रक्रिया अघि बढाउन माग गरेको हो ।  

सम्पत्ति विवरणमा सेयर कारोबार लुकाइएको आरोप र विवादास्पद व्यापारीसँगको नजिक सम्बन्धका कारण गृहमन्त्री गुरुङ विवादमा तानिएका छन् ।

गृहमन्त्रीसँग सम्बन्धित रूपमा बाहिर आएका घटनाक्रमले केवल शंका मात्र सिर्जना नगरी विगतमा हुन सक्ने अनियमितता र विकृतिका पक्षहरू पनि उजागर गर्न सक्ने विज्ञप्तिमा उल्लेख गरिएको छ ।  

पार्टीले गृहमन्त्रीसँग जोडिएका विषयमा स्वतन्त्र र निष्पक्ष अनुसन्धान अघि बढाउन जोड दिएको छ । यसका लागि कुनै पनि किसिमको प्रभाव वा दबाबबाट मुक्त वातावरणमा अनुसन्धान हुनुपर्ने एमालेको धारणा छ । साथै, गृहमन्त्रीसँग सम्बन्धित सबै प्रकरण छानबिन गर्न उच्चस्तरीय समिति गठन गरी तुरुन्त अनुसन्धान सुरु गर्नुपर्ने माग गरिएको छ ।

एमालेले गृहमन्त्री स्वयंले पनि अनुसन्धानमा कुनै अवरोध नगरी सहज, पारदर्शी र प्रभावरहित वातावरण बनाउन पहल गर्नुपर्ने बताएको छ ।

मन्त्रीहरूको सम्पत्ति विवरण सार्वजनिक भएपछि सरोकारवालाहरूबीच चासो र प्रश्नहरू उठ्दै आएको एमालेले जनाएको छ । यस विषयमा आगामी दिनमा अझ विस्तृत बहस र छलफल हुने पनि पार्टीको विश्वास छ ।

एमालेको भनाइमा, गृहमन्त्रीसँग जोडिएको प्रकरणले शंका मात्र होइन, अघिल्ला सम्भावित अनियमितता र विकृतिका तथ्यहरू क्रमशः बाहिर आउने संकेत समेत गरेको छ ।