संघर्षबाट २१६ करोडको कारोबारसम्मस् सन्नी कोहलीको प्रेरणादायी यात्रा

भनिन्छ भने मेहनत, लगन र हिम्मत भए सफलता आफैं पछि लाग्छ भन्ने भनाइ अवनीत सिंह कोहली ‘सन्नी’ को जीवनले प्रमाणित गरेको छ।  

दिल्लीको शालीमार बागमा जन्मिएका सन्नी एक सामान्य कारोबारी परिवारका हुन्।  

तर कक्षा ८ मा पढ्दै गर्दा उनका बुबा दुर्घटनामा परेपछि जीवन नै बदलियो। तीन वर्षसम्म उनी ओछ्यानमै परे, उपचारमा सबै सम्पत्ति सकियो र परिवार आर्थिक रूपमा पूर्ण संकटमा पर्‍यो।

 

घरमा खाने–बस्ने अवस्थासम्म कठिन भएपछि सन्नीको परिवारले आमाको गहना बेचेर करिब २० हजार रुपैयाँ जुटायो र स्टेबलाइजर बनाउने सानो व्यवसाय शुरु गर्‍यो। सन्नी पनि पढाइसँगै यही काममा जोडिए।  

पछि यो व्यवसाय राम्रोसँग चल्न थाल्यो, तर २०१० पछि विद्युत् प्रणाली सुधार भएपछि स्टेबलाइजरको बजार नै समाप्त भयो।

त्यसपछि उनले नयाँ बाटो रोजे—सेकेन्ड ह्यान्ड कार व्यवसाय। सुरुमा करोल बागमा काम सिके, पछि आफ्नो फ्ल्याट बेचेर व्यवसाय शुरु गरे तर त्यो सफल भएन।  

हार नमान्दै २०११ मा नारायणा क्षेत्रमा ‘Auto Best’ नामको सानो शोरूम खोलेर प्रिमियम सेकेन्ड ह्यान्ड कारको कारोबार शुरु गरे।

इन्टरनेट विस्तारसँगै उनको व्यवसाय तीव्र रूपमा बढ्यो। पछि भाइ ‘हन्नी’ पनि जोडिए र कम्पनी विस्तार हुँदै ‘Auto Best Emperio’ बन्यो।  

समयसँगै उनीहरूले मर्सिडिज, बीएमडब्ल्यू, अडी, ल्यान्ड रोभर जस्ता लक्जरी कारहरूको ठूलो कारोबार गर्न थाले।

आज उनीहरूको कम्पनीको टर्नओभर करिब २१६ करोड रुपैयाँ पुगेको छ। 

५० लाखदेखि करोडौँ मूल्यका कार कारोबार गर्ने यो कम्पनीका ग्राहकमा उद्योगपति र सेलिब्रेटीहरू पनि रहेका छन्।  

सन्नी र हन्नी अहिले ठूलो व्यवसायिक सफलता पाइसकेका छन् र आगामी वर्षहरूमा कम्पनीलाई अझ ठूलो बनाउने लक्ष्य राखेका छन्।