मधेस प्रदेशमा गहुँ उत्पादनमा गिरावट

काठमाण्डौ । गहुँ उत्पादनका लागि उर्वर मानिने मधेस प्रदेशमा यस वर्ष गहुँ उत्पादनमा कमी आएको छ। मधेस प्रदेश कृषि निर्देशनालयका अनुसार यस वर्ष प्रदेशभर ३ लाख ७३२ हेक्टर क्षेत्रफलमा गहुँ खेती गरिएकोमा प्रतिहेक्टर औसत १.८ मेट्रिक टनका दरले कुल ५ लाख ४३ हजार १६० मेट्रिक टन उत्पादन भएको छ।

अघिल्लो वर्ष सोही प्रदेशमा १ लाख ७८ हजार ४३३ हेक्टर क्षेत्रमा गहुँ खेती गरी प्रतिहेक्टर ३.३७ मेट्रिक टनका दरले ७ लाख ३१ हजार मेट्रिक टन उत्पादन भएको थियो। यस वर्ष उत्पादन र उत्पादकत्व दुवैमा उल्लेखनीय गिरावट देखिएको छ।

जिल्लागत तथ्यांकअनुसार यस वर्ष सबैभन्दा बढी गहुँ उत्पादन धनुषामा ९८ हजार ४९० मेट्रिक टन भएको छ भने सप्तरीमा ८२ हजार ३२० मेट्रिक टन, महोत्तरीमा ७२ हजार ८०० मेट्रिक टन, बारामा ७१ हजार ९२० मेट्रिक टन, सर्लाहीमा ६९ हजार ५९६ मेट्रिक टन, पर्सामा ५९ हजार ८५२ मेट्रिक टन, रौतहटमा ५२ हजार ७४१ मेट्रिक टन तथा सिरहामा ३५ हजार ४४१ मेट्रिक टन उत्पादन भएको छ।

प्रतिकूल मौसम, रोग तथा कीराको प्रकोप, सिँचाइ अभाव र गुणस्तरीय बीउबिजनको कमीका कारण यस वर्ष गहुँ उत्पादनमा गिरावट आएको जनाइएको छ।