निर्माण व्यवसायीसँग प्रधानमन्त्री शाहको छलफल, भुक्तानी समस्या समाधानमा सकारात्मक

काठमाण्डौ । प्रधानमन्त्री बालेन्द्र शाहले निर्माण व्यवसायीहरुसँग छलफल गरेका छन् । बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्री शाहले अर्थतन्त्र र निर्माण क्षेत्रको अवस्थाबारे चासो व्यक्त गरेका हुन् ।

छलफलमा सहभागी निर्माण व्यवसायीका अनुसार क्षणिक लाभभन्दा माथि उठेर दीर्घकालीन रूपमा निर्माण क्षेत्रलाई कसरी अघि बढाउने भन्ने विषयमा छलफल भएको थियो ।

प्रधानमन्त्रीको सचिवालयका अनुसार नेपाल निर्माण व्यवसायी महासंघका पदाधिकारीहरुसँगको छलफलमा प्रधानमन्त्री शाहले निर्माण क्षेत्र मुलुकको आर्थिक विकास, रोजगारी सिर्जना र पूर्वाधार निर्माणको महत्वपूर्ण आधार भएको बताए । उनले यस क्षेत्रमा देखिएका व्यावहारिक समस्याको समाधानका लागि सरकार सकारात्मक रहेको धारणा राखे ।

प्रधानमन्त्री शाहले निर्माण व्यवसायलाई मर्यादित, पारदर्शी, जिम्मेवार र परिणाममुखी बनाउँदै विकास निर्माणका काम समयमै सम्पन्न गर्न सबै पक्षको सक्रिय र प्रभावकारी सहकार्य आवश्यक रहेको बताए ।

छलफलमा नेपाल निर्माण व्यवसायी महासंघका अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेशका उपाध्यक्ष बालकृष्ण थापा तथा महासंघका पूर्वअध्यक्ष एवं सल्लाहकार जयराम लामिछाने सहभागी थिए ।

व्यवसायीहरुले निर्माण क्षेत्रले भोग्दै आएको भुक्तानी समस्या, म्याद थप नभएको विषय, ठेक्का व्यवस्थापन, समयमै आयोजना कार्यान्वयन, मूल्य समायोजन, बैंकिङ तथा लगानीसम्बन्धी चुनौतीबारे प्रधानमन्त्री शाहलाई जानकारी गराएका थिए ।

उनीहरुले निर्माण उद्योगलाई चलायमान बनाउन सरकार र निजी क्षेत्रबीचको सहकार्यलाई अझ प्रभावकारी बनाउनुपर्ने धारणा राखेका थिए ।

आधा घण्टाका लागि समय लिएर गएका निर्माण व्यवसायीहरुले प्रधानमन्त्रीसँग करिब एक घण्टा छलफल गरेका थिए । छलफलका क्रममा प्रधानमन्त्री शाहले निर्माण क्षेत्रको समस्या समाधानका लागि सरकारले आवश्यक पहल गर्ने आश्वासन दिएका थिए ।

निर्माण क्षेत्र रुग्ण अवस्थामा रहेको भन्दै प्रधानमन्त्री शाहले यसको सुधारका लागि सरकार गम्भीर रहेको बताए । व्यवसायीका अनुसार भुक्तानी समस्या समाधान र मूल्य समायोजनका विषयमा प्रधानमन्त्री सकारात्मक देखिएका छन् ।