राहदानी छपाइ प्रकरणमा अनियमितताबारे छलफल गर्न सार्वजनिक लेखा समिति बैठक आह्वान

काठमाण्डौ । राहदानी छपाइ प्रक्रियामा देखिएका अनियमितता र विवादबारे छलफल गर्न प्रतिनिधिसभाको सार्वजनिक लेखा समितिले बैठक बोलाएको छ।

समिति सभापति भरतबहादुर खड्काका अनुसार राहदानी छपाइसम्बन्धी विषयमा छलफल गर्न मंगलबार बिहान ९ बजे बैठक बस्ने तय भएको छ। बैठकमा राहदानी छपाइ प्रक्रियाबारे जानकारी लिन परराष्ट्र मन्त्रालय र राहदानी विभागका अधिकारीहरूलाई बोलाइएको उनले जानकारी दिए।

राहदानी खरिद प्रक्रियामा करिब १० अर्ब १३ करोड रुपैयाँ बराबरको विवाद रहेको विषय समितिमा उठेको छ। यस सम्बन्धमा उजुरीसमेत परेको र विषय गम्भीर भएकाले छलफलका लागि बैठक आह्वान गरिएको सभापति खड्काले बताए।

यसअघि असार २३ गते बसेको सार्वजनिक लेखा समितिको बैठकमा राहदानी छपाइ प्रक्रियामा भएको भनिएको भ्रष्टाचार तथा अनियमितताका विषयमा छलफल भएको थियो। समितिले यस विषयमा थप जानकारी लिएर आवश्यक प्रक्रिया अघि बढाउने तयारी गरेको छ।