लामो समयपछि फर्किएका कोनोर म्याकग्रेगरले ६९ सेकेन्डमै हारे यूएफसी फाइट

काठमाण्डौ । लामो समयपछि अष्टकोनमा फर्किएका पूर्व यूएफसी च्याम्पियन कोनोर म्याकग्रेगरको पुनरागमन निराशाजनक रूपमा अन्त्य भएको छ। यूएफसी ३२९ को मुख्य भिडन्तमा म्याक्स होलोवेविरुद्ध प्रतिस्पर्धा गर्ने क्रममा म्याकग्रेगर दायाँ घुँडामा लागेको चोटका कारण केवल ६९ सेकेन्डमै टीकेओ (टेक्निकल नकआउट) हार व्यहोर्न बाध्य भए।

३७ वर्षीय आयरिस खेलाडी म्याकग्रेगरले सुरुवाती क्षणमै आक्रामक शैली देखाउँदै राउन्डहाउस किक प्रहार गर्ने प्रयास गरेका थिए। तर, किकपछि खुट्टा टेक्ने क्रममा उनको दायाँ घुँडामा समस्या देखियो। उनी पटक–पटक लडेपछि रेफ्री माइक बेल्ट्रानले खेल रोक्ने निर्णय गरे।

म्याक्स होलोवेले अप्रत्याशित जित हात पारे पनि यो नतिजाबाट आफू पूर्ण सन्तुष्ट नभएको बताए। उनले म्याकग्रेगरको चोट गम्भीर नभएको कामना गर्दै भविष्यमा पुनः प्रतिस्पर्धा गर्ने सम्भावना खुला राखे।

होलोवेका अनुसार म्याकग्रेगरको शारीरिक अवस्था अचानक परिवर्तन भएको आफूले महसुस गरेको बताएका छन्। उनले भने, ‘उनको व्यवहार परिवर्तन भयो, त्यसपछि अवस्था बुझ्न सजिलो भयो।’

खेलपछि म्याकग्रेगरले सामाजिक सञ्जाल ‘एक्स’ मार्फत आफूलाई प्रशिक्षण अवधिमा कुनै चोट नरहेको दाबी गर्दै यो समस्या अचानक आएको बताएका छन्। उनले मानसिक रूपमा निकै कठिन अवस्थामा रहेको पनि उल्लेख गरे।

यो भिडन्त सन् २०१३ को फेदरवेट प्रतिस्पर्धाको पुनरावृत्ति थियो, जहाँ म्याकग्रेगरले होलोवेलाई अंकका आधारमा पराजित गरेका थिए। पाँच वर्षपछि यूएफसीमा फर्किएका म्याकग्रेगरको पछिल्लो प्रतिस्पर्धा सन् २०२१ मा डस्टिन पोइरियरविरुद्ध भएको थियो, जहाँ उनी खुट्टाको गम्भीर चोटमा परेका थिए।

म्याकग्रेगर यूएफसी इतिहासका सबैभन्दा चर्चित र व्यावसायिक रूपमा सफल खेलाडीमध्ये एक हुन्।

सन् २०१६ मा उनी फरक तौल समूहमा एकै समयमा दुई उपाधि जित्ने पहिलो यूएफसी खेलाडी बनेका थिए। उनको करियरमा २०१७ मा फ्लोयड मेवेदरसँगको बक्सिङ सुपरफाइटबाट ठूलो आर्थिक सफलता पनि प्राप्त भएको थियो।

तर पछिल्ला वर्षहरूमा चोटका कारण उनको करियर प्रभावित हुँदै आएको छ। यूएफसी ३२९ को छोटो भिडन्तपछि अब म्याकग्रेगरको भविष्य र पुनरागमनबारे प्रश्न उठ्न थालेका छन्।