आशा लघुवित्तको वितरणयोग्य मुनाफा १६२% ले बढ्यो, खुद नाफा र लाभांश क्षमतामा समेत सुधार

Capital Market
बिहीबार, श्रावण २१,२०८३ 10:43:30

काठमाण्डौ । आशा लघुवित्त वित्तीय संस्था लिमिटेडको वितसणयोग्य मुनाफा १६२.८९ प्रतिशतले बढेको छ । संस्थाले सार्वजनिक गरेको गत आवको चौथो त्रैमासिक प्रतिवेदनअनुसार संस्थाको वितरणयोग्य मुनाफा २१ करोड ६० लाख पुगेको छ । अघिल्लो आवको सोही अवधिसम्म भने यस्तो रकम ८ करोड २१ लाखमा सीमित थियो ।

वितरणयोग्य मुनाफासँगै संस्थाको लाभांश क्षमतामा समेत बढोत्तरी आएको छ । अघिल्लो आवमा ११.२१ प्रतिशत रहेको लाभांश क्षमता बढेर २६.९१ प्रतिशत पुगेको छ ।

यस्तै संस्थाले चौथो त्रैमाससम्ममा २६ करोड १९ लाख रुपैयाँ खुद नाफा आर्जन गरेको छ । यो रकम अघिल्लो आवको सोहि अवधिको तुलनामा १५५.२१ प्रतिशतले बढी हो । अघिल्लो आवको सोहि अवधिसम्म भने संस्थाले १० करोड २६ लाख रुपैयाँ खुद नाफा आर्जन गरेको थियो ।

खुद ब्याज आम्दानी बढ्नु र इम्पेयरमेन्ट चार्ज घट्नु जस्ता कारणले संस्थाको मुनाफामा सुधार आएको हो । यो अवधिसम्म संस्थाले ८८ करोड ४५ लाख रुपैयाँ खुद ब्याज आम्दानी गरेको छ । अघिल्लो आवमा संस्थाले ७५ करोड ४० लाख रुपैयाँ खुद ब्याज आम्दानी गरेको थियो ।

यस्तै संस्थाको इम्पेयरमेन्ट चार्ज पनि २६ करोड ६७ लाख रुपैयाँबाट घटेर २२ करोड २० लाखमा सीमित बनेको छ ।

संस्थाको रिटेन्ड अर्निङ १६२.८९ प्रतिशतले बढेको छ । अघिल्लो आवको चौथो त्रैमाससम्म ८ करोड २१ लाख रुपैयाँ रहेको रिटेन्ड अर्निङ बढेर २१ करोड ६० लाख पुगेको छ । संस्थाको रिजर्भको आकार पनि ३३ करोड ३० लाख रुपैयाँबाट बढेर ३८ करोड ३३ लाख रुपैयाँ पुगेको छ ।

अघिल्लो आवको चौथो त्रैमाससम्म ३ अर्ब २१ करोड रुपैयाँ रहेको निक्षेप संकलन बढेर ३ अर्ब ८१ करोड रुपैयाँ पुगेको छ । त्यस्तै कर्जा प्रवाह पनि १० अर्ब २९ करोड रुपैयाँबाट बढेर ११ अर्ब ५९ करोड रुपैयाँ पुगेको छ ।

संस्थाको खराब कर्जा अनुपात बढेको छ । संस्थाको खराब कर्जा अनुपात ६.४९ प्रतिशतबाट बढेर ८.५७ प्रतिशत पुगेको छ ।

समीक्षा अवधिसम्म संस्थाको प्रतिसेयर आम्दानी(ईपीएस) ३२.६२ रुपैयाँ,प्रतिसेयर नेटवर्थ १७४.६७ रुपैयाँ,प्रतिसेयर कुल सम्पत्तिको मूल्य १५३४.२ रुपैयाँ,मूल्य आम्दानी अनुपात ३२.१८ गुणा र तरलता अनुपात ५.६७ प्रतिशत कायम भएको छ ।