युक्रेनद्वारा रुसका दुई ठूला तेल रिफाइनरीमा ड्रोन आक्रमण, रुसले ६०५ ड्रोन खसालेको दाबी

काठमाण्डौ । युक्रेनले रुसको यारोस्लाभ क्षेत्रस्थित एक प्रमुख तेल रिफाइनरीसहित दुई ठूला रिफाइनरीलाई लक्षित गर्दै ड्रोन आक्रमण गरेको जनाएको छ। पछिल्ला साताहरूमा युक्रेनले रुसका उर्जा तथा सैन्य पूर्वाधारमाथि आक्रमणलाई तीव्र बनाइरहेको छ।

युक्रेनी राष्ट्रपति भोलोदिमिर जेलेन्स्कीले यारोस्लाभस्थित स्लाभनेफ्ट–यानोस रिफाइनरी र बश्कोर्तोस्तानस्थित बासनेफ्ट–नोभोइल रिफाइनरीलाई निशाना बनाइएको पुष्टि गरेका छन्।

उता, यारोस्लाभ क्षेत्रका गभर्नर मिखाइल येभ्रायेभले उक्त क्षेत्रमा अहिलेसम्मकै सबैभन्दा ठूलो ड्रोन आक्रमण भएको दाबी गरेका छन्। उनका अनुसार रुसी वायु प्रतिरक्षा प्रणालीले ९२ वटा ड्रोन खसालेको छ। यद्यपि, ड्रोनका अवशेष खस्दा तीनवटा घरमा आगलागी भएको उनले बताएका छन्।

रुसको रक्षा मन्त्रालयले भने देशका विभिन्न क्षेत्रमा युक्रेनले प्रहार गरेका ६०५ वटा ड्रोनलाई अवरोध गरी नष्ट गरिएको दाबी गरेको छ।

हालका साताहरूमा युक्रेनले रुसका तेल रिफाइनरी, इन्धन भण्डारण केन्द्र तथा सैन्य संरचनामाथि लगातार ड्रोन आक्रमण गर्दै आएको छ। यी आक्रमणलाई रुसको युद्ध क्षमता कमजोर बनाउने रणनीतिक प्रयासका रूपमा हेरिएको छ।

यसैबीच, युक्रेनी अधिकारीहरूले रुसले गरेको छुट्टै ड्रोन आक्रमणमा एक आवासीय क्षेत्रमा तीन जनाको मृत्यु भएको दाबी गरेका छन्।