इम्पेयरमेन्ट चार्ज रिभर्सल भएसँगै गोर्खाज फाइनान्स २१.९४ करोड नाफामा

Capital Market
बुधबार, श्रावण २७,२०८३ 09:32:28

काठमाण्डौ । इम्पेयरमेन्ट चार्ज रिभर्सल भएसँगै र खुद ब्याज आम्दानी बढेसँगै गोर्खाज फाइनान्स नाफामा गएको छ । कम्पनीले गत आवको चौथो त्रैमाससम्म २१ करोड ९४ लाख रुपैयाँबराबरको खुद नाफा आर्जन गरेको छ । अघिल्लो आवको सोही अवधिसम्म भने कम्पनी १२ करोड १४ लाख रुपैयाँ घाटामा थियो ।

कम्पनीले उक्त अवधिमा ३१ करोड ३३ लाख रुपैयाँबराबरको खुद ब्याज आम्दानी गरेको छ । अघिल्लो आवमा भने कम्पनीको खुद ब्याज आम्दानी २९ करोड ५० लाखमा सीमित थियो ।

चौथो त्रैमाससम्म कम्पनीको इम्पेयरमेन्ट चार्ज २७ करोड ५७ लाख रुपैयाँले रिभर्सल भएको छ ।

समीक्षा अवधिसम्म कम्पनीको रिटेन्ड अर्निङ ४४ करोड ८४ लाख रुपैयाँले ऋणात्मक रहेको छ । कम्पनीको रिजर्भको आकार पनि घटेको छ । अघिल्लो आवमा १ अर्ब ७ करोड रुपैयाँ रहेको रिजर्भ घटेर १ अर्ब १ करोडमा खुम्चिएको छ । कम्पनीको सेयर प्रिमियम शीर्षकमा २ करोड २९ लाख रुपैयाँ रहेको छ ।

कम्पनीको वितरणयोग्य मुनाफा ४४ करोड ८४ लाख रुपैयाँले ऋणात्मक रहेको छ ।

ग्राहकहरुबाट कम्पनीले ९ अर्ब ३८ करोड रुपैयाँबराबरको निक्षेप संकलन गरेको छ भने ५ अर्ब ९८ करोड रुपैयाँ कर्जा प्रवाह गरेको छ । कम्पनीको खराब कर्जा अनुपात १७.४६ प्रतिशतबाट घटेर १३.३२ प्रतिशतमा सीमित बनेको छ ।

समीक्षा अवधिसम्म कम्पनीको प्रतिसेयर आम्दानी(ईपीएस)२५.२८ रुपैयाँ , प्रतिसेयर नेटवर्थ १६६.३२ रुपैयाँ,प्रतिसेयर कुल सम्पत्तिको मूल्य १ हजार २४६.४२ रुपैयाँ र तरलता अनुपात ३८.९२ प्रतिशत कायम भएको छ ।