दिल्ली हाईकोर्टसहित भारतको राजधानीका विभिन्न स्थानमा बम विस्फोटको धम्की

विश्व अर्थतन्त्र
शुक्रबार, श्रावण २९,२०८३ 18:07:13

काठमाण्डौ। भारतको राजधानी नयाँदिल्लीस्थित दिल्ली हाईकोर्ट, इन्दिरा गान्धी अन्तर्राष्ट्रिय विमानस्थलसहित विभिन्न महत्वपूर्ण स्थानमा शुक्रबार बम विस्फोटको धम्की दिइएको छ ।

भारतीय सञ्चारमाध्यमका अनुसार ‘Blast Delhi High Court @2:11 PM’ शीर्षकमा पठाइएको धम्कीपूर्ण इमेलमा शनिबार दिउँसो २ बजेर ११ मिनेटमा दिल्ली हाईकोर्टमा बम विस्फोट गराउने र त्यसको एक घण्टापछि विभिन्न जिल्ला अदालतमा विस्फोट गराउने दाबी गरिएको छ । भारतको ८०औँ स्वतन्त्रता दिवस समारोहको पूर्वसन्ध्यामा धम्की आएपछि सुरक्षा निकाय सतर्क भएका छन् ।

इमेलमा दिल्लीलाई ‘खालिस्तान’ बनाउने दाबी गर्दै विभिन्न स्थानमा विस्फोट गराउने योजना उल्लेख गरिएको छ । इमेलमा दिल्लीका अदालतमा सिख समुदायविरुद्ध मात्रै मुद्दा चलाउने आरोपसमेत लगाइएको छ । साथै, आफूहरू खालिस्तान समर्थक समूहका सदस्य भएको र केही सदस्य दिल्ली पुगिसकेको दाबी गरिएको छ ।

धम्की प्राप्त हुने अन्य स्थानमा जामनगर हाउस, झण्डेवालान भवन, साकेतस्थित कार्यालय, जिल्ला मजिस्ट्रेटको कार्यालय, क्ष्न्क्ष् विमानस्थलको टर्मिनल–३ तथा दिल्ली क्यान्टस्थित एसडीएम कार्यालय रहेका छन् ।

त्यसैगरी दिल्ली मेट्रो तथा अम्बाला जाने रेललाई समेत निशाना बनाउने धम्की दिइएको छ ।

धम्कीपछि सुरक्षा निकायले सम्बन्धित स्थानमा अग्निनियन्त्रक गाडीसहित सुरक्षा टोली परिचालन गरेका छन् । प्रहरीले विभिन्न स्थानमा खोजी तथा जाँच अभियान सञ्चालन गरिरहेको छ । हालसम्म कुनै शंकास्पद वस्तु फेला नपरेको भारतीय सञ्चारमाध्यमले जनाएका छन् ।

धम्कीको विश्वसनीयता तथा इमेल पठाउने व्यक्तिको पहिचानबारे सुरक्षा निकायले अनुसन्धान अघि बढाएका छन् । स्वतन्त्रता दिवसको पूर्वसन्ध्यामा राजधानीका महत्वपूर्ण सरकारी तथा सार्वजनिक स्थानमा सुरक्षा व्यवस्था थप कडा पारिएको छ ।