ईभी बजार तताउन आउँदै नयाँ ‘नामी बक्स’, नाडा अटो शोमा हुँदै सार्वजनिक

NEWS
सोमबार, भाद्र ८,२०८३ 11:59:49

काठमाण्डौ । नेपालमा विद्युतीय सवारीसाधनको बजार विस्तार गरिरहेको नामीले नयाँ मोडल ‘नामी बक्स’ सार्वजनिक गर्ने तयारी गरेको छ । कम्पनीले आगामी नाडा अटो शो २०२६ लाई लक्षित गर्दै नयाँ नामी बक्स नेपाली बजारमा उतार्ने भएको हो ।

सन् २०२४ मा पहिलोपटक नेपालमा सार्वजनिक भएको नामी बक्सले आकर्षक डिजाइन, फराकिलो केबिन, आधुनिक फिचर्स, उपयोगी रेन्ज र फरक रङ संयोजनका कारण छोटो समयमै नेपाली उपभोक्ताको ध्यान खिच्न सफल भएको थियो ।

विशेषगरी सहरी प्रयोगका लागि उपयुक्त डिजाइन, व्यावहारिक इलेक्ट्रिक मोबिलिटी र आधुनिक सुविधाका कारण नामी बक्स नेपाली ईभी बजारमा लोकप्रिय विकल्पमध्ये एक बनेको कम्पनीको दाबी छ ।

नेपालका सडकमा हालसम्म २ हजारभन्दा बढी नामी ब्रान्डका सवारीसाधन सञ्चालनमा आइसकेका छन् । यसले नेपाली विद्युतीय सवारी बजारमा नामीको उपस्थिति विस्तार हुँदै गएको देखाउँछ ।

नामी भिगो ई–२ सार्वजनिक गरेपछि कम्पनीले अब नयाँ पुस्ताको नामी बक्समार्फत आफ्नो उत्पादन पोर्टफोलियोलाई थप बलियो बनाउने तयारी गरेको हो । नयाँ मोडलमा अघिल्लो संस्करणको तुलनामा थप परिष्कृत डिजाइन, सुविधा र प्रविधि उपलब्ध हुने अपेक्षा गरिएको छ ।

कम्पनीले भने नयाँ नामी बक्समा रहने सम्पूर्ण फिचर्स, प्राविधिक विवरण, रेन्ज तथा मूल्यसम्बन्धी जानकारी अहिले सार्वजनिक गरेको छैन । ती सबै विवरण नाडा अटो शो २०२६ को अवसरमा सार्वजनिक गरिने बताइएको छ ।

नेपालमा विद्युतीय सवारीप्रति उपभोक्ताको आकर्षण बढ्दै गएको अवस्थामा नयाँ नामी बक्सको आगमनले कम्प्याक्ट ईभी सेग्मेन्टमा प्रतिस्पर्धा थप चर्काउने अपेक्षा गरिएको छ ।