चाडपर्व नजिकिएसँगै तातोपानी नाका खुलाउने तयारी, पहिरो र भग्नावशेष हटाउने काम तीव्र

काठमाण्डौ। असार ३१ गतेदेखि पूर्ण रूपमा बन्द रहेको नेपाल–चीनबीचको प्रमुख व्यापारिक नाका तातोपानी जोड्ने सडक खुलाउन पहिरो तथा भग्नावशेष हटाउने काम तीव्र पारिएको छ। सोमबारदेखि इको पहिरो, लिपिङ बजारको पहिरो तथा भूकम्पबाट क्षतिग्रस्त घरटहराका भग्नावशेष हटाउन थालिएको हो।

पहिरो र भग्नावशेष हटाउने काम पूरा भएपछि केही दिनभित्रै नाका सडक सञ्चालनमा ल्याउने तयारी गरिएको छ। यसअघि डाक्लाङ क्षेत्रको पहिरो पन्छाइसकिएको थियो।

नेपाल–चीन सीमास्थित मितेरी पुलसँगै रहेको लिपिङ क्षेत्रमा सडक भासिएर साँघुरिएको छ। सडकको माथिल्लो भागमा मानव बस्ती र तल भोटेकोशी नदीको तीव्र बहावका कारण सडकको संरचना तानिँदा यातायात सञ्चालनमा समस्या भएको हो।

इको र डाक्लाङको पहिरो हटाएपछि अहिले लिपिङ क्षेत्रमा पहिरो तथा भग्नावशेष हटाउने र भासिएको सडक उकास्ने काम भइरहेको छ। त्यसका लागि दर्जनौँ मेसिन परिचालन गरिएको छ।

इको पहिरो क्षेत्रमा सडक मर्मत तथा पहिरो नियन्त्रणका लागि सरकारले ४८ करोड ४९ लाख रुपैयाँ बजेट विनियोजन गरेको थियो। नेपाली ठेकेदारसँगको सम्झौता गत वैशाखमा तोडेर सरकारले उक्त कामको जिम्मा चिनियाँ निर्माण कम्पनी चाइना नाइन्टिन्थ मेटलर्जिकल कर्पोरेसनलाई दिएको थियो।

Sponsored

Sponsored

तर चिनियाँ ठेकेदार कम्पनी इको पहिरो क्षेत्रमा काम गर्न नआएपछि सडक डिभिजन कार्यालय आफैंले पहिरो हटाउने काम गरिरहेको छ। सम्झौताअनुसार उक्त बजेटबाट इको पहिरो क्षेत्रमा करिब २०० मिटर सडकको पहिरो नियन्त्रण तथा सडक मर्मत–सुधार गर्नुपर्ने भए पनि ठेकेदार कम्पनी हालसम्म काममा नआएको कार्यालयले जनाएको छ।

लिपिङ क्षेत्रमा रहेका भग्नावशेष हटाई भासिएको सडक मर्मत गरेपछि लिपिङपारि रोकिएका ८५ वटा मालवाहक कन्टेनर तातोपानी भन्सारमा जाँचपासका लागि ल्याउन सकिनेछ।

लिपिङ र इको पहिरोबीच रोकिएका मालवाहक कन्टेनर भने इको क्षेत्रको पहिरो हटाएपछि तातोपानी भन्सारसम्म पुगिसकेका छन्।

तातोपानी नाका पूर्ण रूपमा सञ्चालनमा आए नजिकिँदै गरेका चाडपर्वका लागि आवश्यक सामग्री यही नाकाबाट राजधानीलगायत देशका विभिन्न बजारमा भित्र्याउन सहज हुने जनाइएको छ ।