भोटेकोशीमा आएको बाढीले रसुवागढी जलविद्युत आयोजनामा ठूलो क्षति, कर्मचारीको अवस्था अज्ञात

Capital Market
बिहीबार, भाद्र ११,२०८३ 09:51:21

काठमाण्डौ। रसुवाको भोटेकोशी नदीमा आएको भीषण बाढीका कारण १११ मेगावाट क्षमताको रसुवागढी जलविद्युत आयोजनामा ठूलो क्षति पुगेको छ। आयोजनाको बाँधस्थल, आवासगृह तथा जलविद्युत केन्द्रका अधिकांश संरचनामा बाढीले क्षति पुर्याएको कम्पनीले जनाएको छ।

रसुवागढी हाइड्रोपावर कम्पनी लिमिटेडले सार्वजनिक गरेको जानकारीअनुसार बुधबार बिहान भोटेकोशी नदीमा आएको ठूलो बाढीका कारण आयोजनाका विभिन्न संरचनामा क्षति पुगेको प्रारम्भिक जानकारी प्राप्त भएको हो।

कम्पनीका अनुसार आयोजनाको जलविद्युत केन्द्रमा कार्यरत अधिकांश कर्मचारीको अवस्था समेत हालसम्म अज्ञात रहेको छ। बाढीका कारण आयोजनास्थलमा सम्पर्क तथा उद्धार कार्य प्रभावित भएकाले कर्मचारीको अवस्थाबारे यकिन विवरण प्राप्त हुन नसकेको जनाइएको छ।

कम्पनीले काबुबाहिरको अप्रत्याशित परिस्थितिका कारण हालका लागि रसुवागढी जलविद्युत केन्द्रबाट विद्युत उत्पादन पूर्ण रूपमा बन्द भएको जानकारी दिएको छ।

गोसाइँकुण्ड गाउँपालिका–१ र २ को सीमामा निर्माण सम्पन्न भएको उक्त आयोजनाको संरचनामा भएको क्षतिको विस्तृत विवरण भने प्रारम्भिक मूल्याङ्कनपछि मात्र स्पष्ट हुने कम्पनीले जनाएको छ। बाढीपछि आयोजना क्षेत्रमा खोजी तथा उद्धार कार्यसँगै क्षतिको अवस्थाबारे थप विवरण संकलन गर्ने प्रक्रिया अघि बढ्ने बताइएको छ।