बाढी प्रभावित क्षेत्रमा वैकल्पिक मार्गबाट ग्यास आपूर्ति हुने

काठमाण्डौ । त्रिशूली नदीमा आएको भीषण बाढीका कारण पृथ्वी राजमार्गअन्तर्गत धादिङको बेनीघाट–रोराङ गाउँपालिका–७ स्थित कृष्णभीर खण्डमा सडक अवरुद्ध भएपछि प्रभावित बनेको एलपी ग्यास आपूर्तिका लागि वैकल्पिक व्यवस्था मिलाइएको छ ।

उद्योग, वाणिज्य तथा आपूर्तिमन्त्री गौरीकुमारी यादवले सम्बन्धित निकाय, ग्यास उद्योगी तथा सरोकारवालासँग निरन्तर संवाद र समन्वय गरेपछि काठमाडौं उपत्यकासहित आसपासका जिल्लामा एलपी ग्यासको आपूर्ति सहज बनाउने व्यवस्था गरिएको हो ।

मन्त्री यादवको पहलपछि नेपाल आयल निगमले बारा, पर्सा, चितवन, मकवानपुर, नवलपरासीलगायतका जिल्लामा रहेका ग्यास उद्योगसँग समन्वय गरी खाली सिलिन्डर रिफिल गर्ने व्यवस्था मिलाएको छ । आवश्यकताअनुसार अन्य जिल्लाका ग्यास उद्योगसँग समेत समन्वय गरी आपूर्ति व्यवस्थालाई निरन्तरता दिइनेछ ।

रिफिल गरिएका एलपी ग्यास सिलिन्डरहरू कृष्णभीरको सडक सञ्चालनमा नआएसम्म वैकल्पिक मार्ग हुँदै ट्रकमार्फत काठमाडौं उपत्यका तथा आसपासका जिल्लामा ढुवानी गरी बिक्री–वितरण गरिनेछ ।

त्यस्तै, पेट्रोलियम पदार्थ तथा एलपी ग्यासको आपूर्ति सहज बनाउन ट्यांकर तथा ट्रकलाई स्थानीय प्रशासनसँग समन्वय गरी वैकल्पिक मार्गबाट काठमाडौंसम्म ल्याउने व्यवस्था समेत मिलाइएको नेपाल आयल निगमले जनाएको छ ।

बाढीका कारण मुख्य सडक अवरुद्ध भई पेट्रोलियम पदार्थ तथा एलपी ग्यासको ढुवानीमा समस्या देखिएपछि मन्त्री यादवले तत्काल सम्बन्धित निकाय तथा सरोकारवालासँग निरन्तर छलफल र समन्वय गरेकी थिइन् ।  

वैकल्पिक आपूर्ति प्रणालीमार्फत काठमाडौं उपत्यका तथा आसपासका जिल्लामा ग्यास अभाव हुन नदिने गरी आपूर्ति व्यवस्थापन गरिएको निगमले जनाएको छ ।

कृष्णभीर सडक पुनः सञ्चालनमा नआएसम्म वैकल्पिक मार्ग तथा अन्य जिल्लाका ग्यास उद्योगसँगको समन्वयमार्फत एलपी ग्यासको आपूर्तिलाई निरन्तरता दिइनेछ ।