माथिल्लो त्रिशूली थ्री बीको सुरुङमा नेपाली सेनाको उद्धार प्रयास तीव्र

काठमाण्डौ। रसुवाको भोटेकोशी नदीमा आएको बाढीका कारण प्रभावित नुवाकोटस्थित माथिल्लो त्रिशूली थ्री बी जलविद्युत आयोजनाको सुरुङमा नेपाली सेनाले आज पनि खोज तथा उद्धार कार्यलाई तीव्रता दिएको छ।

सुरुङभित्र मानिसहरू फसेको आशंका गरिएपछि नेपाली सेनाको भैरवनाथ गणको टोलीले सुरुङ क्षेत्रमा खन्ने तथा खोजी गर्ने काम जारी राखेको छ। आज बिहान ९ बजेदेखि भैरवनाथ गणका थप १६ जना सैनिक उद्धार कार्यमा परिचालन भएका छन्।

यसअघि भदौ १४ गतेदेखि नै नेपाली सेना र नेपाल विद्युत प्राधिकरणको संयुक्त टोलीले सुरुङ क्षेत्रमा खोज तथा उद्धारको प्रयास सुरु गरेको थियो। उक्त दिन भैरवनाथ गणका १५ जना सैनिक तथा प्राधिकरणको टोली उद्धार कार्यमा खटिएको थियो।

Sponsored

Sponsored

यसअघि नेपाल सरकारको अनुमतिमा भदौ १३ गते चिनियाँ उद्धार टोली निजी हेलिकप्टरसहित नुवाकोटको त्रिशूली पुगेको थियो। नेपाली सेनासँग समन्वय गरी उक्त टोली माथिल्लो त्रिशूली थ्री बी जलविद्युत आयोजनाको सुरुङ क्षेत्रमा पुगेर रेकी गरेको थियो।

चिनियाँ उद्धार टोलीले सोही दिन रसुवास्थित माथिल्लो त्रिशूली–१ जलविद्युत आयोजनाको क्षेत्रमा समेत रेकी गरेको थियो। दुवै आयोजनाको स्थलगत निरीक्षणपछि टोलीले त्यहाँको वस्तुस्थितिबारे नेपाली सेनालाई जानकारी गराएको थियो।

भदौ १४ गते चिनियाँ उद्धार टोली रसुवास्थित माथिल्लो त्रिशूली–१ जलविद्युत आयोजना क्षेत्रमा उद्धार कार्यमा केन्द्रित भएको थियो। यता माथिल्लो त्रिशूली थ्री बीको सुरुङमा भने नेपाली सेना र नेपाल विद्युत प्राधिकरणको संयुक्त टोलीले खोज तथा उद्धार कार्य अघि बढाएको हो।

बाढीका कारण आयोजनाको सुरुङ क्षेत्रमा क्षति पुगेपछि त्यहाँ मानिसहरू फसेको हुनसक्ने आशंका गरिएको छ। उद्धार टोलीले सुरुङभित्र प्रवेश गरी सम्भावित स्थानमा निरन्तर खोजी तथा उत्खनन गरिरहेको छ।