टेलिकमको बाढी प्रभावित १२० मध्ये ११३ साइट सञ्चालनमा

CORPORATE
मंगलवार, भाद्र १६,२०८३ 17:48:02

काठमाण्डौ । बाढीका कारण प्रभावित दूरसञ्चार सेवा पुनर्स्थापनामा नेपाल टेलिकमले उल्लेख्य प्रगति गरेको छ। टेलिकमले सोमबार थप तीनवटा साइट सञ्चालनमा ल्याएसँगै बाढीबाट प्रभावित १२० साइटमध्ये ११३ वटा सञ्चालनमा आएका छन्।

टेलिकमका अनुसार धादिङको कल्लेरी तथा नुवाकोटका भद्रटार थप्रेक र पुसनटार साइट पुनः सञ्चालनमा ल्याइएको हो। यी साइट सञ्चालनमा आएसँगै सम्बन्धित क्षेत्रका ठूलो संख्यामा सेवाग्राही पुनः नियमित दूरसञ्चार सेवाको पहुँचमा आएका छन्।

कल्लेरी साइट सञ्चालनमा आएपछि आदमघाट, पिपलटार, सुनौलाबजार, घुमाउने डाँडा, कल्लेरी र बेल्टारलगायत क्षेत्रका सेवाग्राहीले सेवा पाउने भएका छन्।

त्यस्तै, भद्रटार थप्रेक साइटबाट पञ्चकन्या, थप्रेक, महाकाली, समुन्द्रादेवी र रालुकादेवी क्षेत्रका सेवाग्राही लाभान्वित हुनेछन्। पुसनटार साइट पुनः सञ्चालनमा आएपछि पिपलटार, देवीघाट, माझीगाउँ, सिरखाली र भुवानीवेशीलगायत क्षेत्रमा दूरसञ्चार सेवा विस्तार भएको टेलिकमले जनाएको छ।

नेपाल टेलिकमका अनुसार ११३ साइट सञ्चालनमा आएसँगै बाढीअघि नेटवर्क उपलब्ध रहेका लगभग सबै स्थानमा पुनः नेटवर्क पहुँच पुगेको छ। टेलिकमले प्रभावित क्षेत्रमा आंशिक क्षमतामा सञ्चालन भइरहेका साइटलाई समेत क्रमशः पूर्ण क्षमतामा सञ्चालन गर्ने काम जारी राखेको जनाएको छ।

बाढीबाट क्षतिग्रस्त दूरसञ्चार पूर्वाधारको पुनर्स्थापना तीव्र पार्दै टेलिकमले बाँकी सातवटा प्रभावित साइट पनि क्रमिक रूपमा सञ्चालनमा ल्याउने तयारी गरिरहेको छ।