अस्वभाविक चलखेल रोक्न १५ मिनेट क्लोजिङ प्रणाली फेरि लागू गर्ने तयारीमा सेबोन

काठमाण्डौ । स्थगित भएको १५ मिनेटे ‘क्लोजिङ’ प्रणाली फेरि ब्युँताउने तयारीमा नेपाल धितोपत्र बोर्ड पुगेको छ ।  

कारोबारको अन्तिम समयमा हुने अस्वाभाविक चलखेल नियन्त्रण गर्दै कम्पनीको अन्तिम मूल्यलाई थप पारदर्शी बनाउने भन्दै सेबोनले नेप्सेसँग उक्त व्यवस्था पुनः लागू गर्ने विषयमा सुझाव मागेको हो ।

कारोबार सत्रको अन्तिम १५ मिनेटमा भएको कारोबारलाई आधार बनाएर भारित औसत मूल्यबाट क्लोजिङ मूल्य निर्धारण गर्ने व्यवस्था पुनः लागू गर्ने विषयमा सेबोनले नेप्सेसँग राय मागेको हो ।

सेयर कारोबारको अन्तिम समयमा हुने अस्वाभाविक मूल्य उतारचढाव तथा चलखेल नियन्त्रण गर्ने उद्देश्यले यसअघि लागू गरिएको उक्त व्यवस्था पुनः कार्यान्वयन गर्ने तयारी सेबोनले थालेको हो ।

सेबोनका अधिकारीहरूका अनुसार आन्तरिक छलफलका क्रममा कारोबारको अन्तिम मूल्य निर्धारण गर्दा अन्तिम १५ मिनेटको औसत मूल्यलाई आधार बनाउनु तुलनात्मक रूपमा पारदर्शी हुने निष्कर्ष निकालिएको छ । त्यसपछि उक्त व्यवस्था पुनः लागू गर्न सकिने वा नसकिने विषयमा नेप्सेसँग औपचारिक सुझाव मागिएको हो ।

स्रोतका अनुसार सेबोन अध्यक्ष डा. गोपाल भट्टको निर्देशनपछि नेप्सेलाई सुझावका लागि पत्र पठाइएको हो । अध्यक्ष भट्ट कम्पनीको अन्तिम सेयर मूल्य निर्धारण अन्तिम १५ मिनेटको कारोबारबाट कायम हुने भारित औसत मूल्यका आधारमा गर्नुपर्ने पक्षमा रहेको स्रोतको भनाइ छ ।

यसअघि २०८१ चैतको पहिलो साता धितोपत्र कारोबार सञ्चालन विनियमावलीमा चौथो संशोधन गर्दै नेप्सेले क्लोजिङ प्राइस निर्धारणमा अन्तिम १५ मिनेटको कारोबारलाई आधार बनाउने व्यवस्था लागू गरेको थियो । उक्त व्यवस्थाअनुसार कारोबार सत्रको अन्तिम १५ मिनेटमा भएको कारोबारको भारित औसतका आधारमा कम्पनीको अन्तिम मूल्य कायम हुने व्यवस्था गरिएको थियो ।

तर, कार्यान्वयनमा आएको करिब ६ महिनापछि सेबोनले २०८२ असोज ७ गते उक्त व्यवस्था स्थगित गरेको थियो । स्थगनपछि पुनः पुरानै प्रणालीअनुसार अन्तिम कारोबारबाट क्लोजिङ मूल्य निर्धारण हुँदै आएको छ ।

अब भने सेबोनले उक्त व्यवस्थालाई फेरि कार्यान्वयनमा ल्याउने सम्भावना बढेको छ । त्यसका लागि नेप्सेबाट प्राविधिक तथा व्यावहारिक पक्षमा सुझाव मागिएको छ ।

सेबोनले नेप्सेलाई पठाएको पत्रमा स्थगित गरिएको कारोबार सत्रको अन्तिम १५ मिनेटको कारोबारलाई आधार लिएर नेप्से सूचकांक गणना गर्ने विधि पुनः कार्यान्वयन गर्न सकिने वा नसकिने सम्बन्धमा सुझाव पेस गर्न भनिएको छ ।