आईजीपी कार्कीविरुद्ध सांसद सुनारको अभिव्यक्ति संसद्को रेकर्डबाट हटाउन सभामुखको निर्देशन

 

काठमाण्डौ । सभामुख डीपी अर्यालले राष्ट्रिय स्वतन्त्र पार्टी (रास्वपा)का सांसद खगेन्द्र सुनारले नेपाल प्रहरीका महानिरीक्षक (आईजीपी) दानबहादुर कार्कीलाई लक्षित गर्दै दिएको अभिव्यक्तिको केही अंश प्रतिनिधिसभाको अभिलेखबाट हटाउन निर्देशन दिएका छन्।

मंगलबार बसेको प्रतिनिधिसभा बैठकमा सभामुख अर्यालले भदौ २६ गतेको बैठकमा सांसद सुनारले दिएको अभिव्यक्तिको निश्चित अंश रेकर्डबाट हटाउन संसद् सचिवालयलाई निर्देशन दिएका हुन्।

सभामुख अर्यालले भने, “माननीय खगेन्द्र सुनारले मिति २०८३ भदौ २६ गतेको बैठकमा ‘कहिल्यै पनि’ भन्ने वाक्यांशदेखि ‘आरोप गम्भीर हुन्छ’ भन्ने वाक्यांशसम्मको शब्दावली सभाको अभिलेखबाट हटाउन सचिवालयलाई निर्देश गर्दछु।”

भदौ २६ गतेको प्रतिनिधिसभा बैठकमा सांसद सुनारले आईजीपी कार्कीमाथि गम्भीर आरोप लगाउँदै उनलाई तत्काल पदबाट हटाएर छानबिन गर्नुपर्ने माग गरेका थिए।

सो क्रममा उनले “बाबुलाई छोरीको, पुलिसलाई चोरीको आरोप गम्भीर हुन्छ” भन्ने अभिव्यक्ति प्रयोग गर्दै आईजीपी कार्कीमाथि लागेको आरोपलाई सामान्य रूपमा लिन नहुने बताएका थिए।

उनले आरोपको निष्पक्ष छानबिनका लागि आईजीपीलाई पदमा राखिरहन नहुने भन्दै तत्काल बर्खास्त गरेर अनुसन्धान अघि बढाउन माग गरेका थिए।

तर सांसद सुनारले प्रयोग गरेको उक्त अभिव्यक्तिको केही अंश संसदीय मर्यादा र अभिलेखमा राख्न उपयुक्त नभएको ठहर गर्दै सभामुखले हटाउन निर्देशन दिएका हुन्।

सभामुखको निर्देशनपछि अब संसद् सचिवालयले तोकिएको अंश प्रतिनिधिसभाको आधिकारिक अभिलेखबाट हटाउनेछ।