एभरेष्ट बैंकको १३४ औँ शाखा धनगढीमा, नयाँ भवन पनि सञ्चालनमा

काठमाण्डौ। एभरेष्ट बैंक लिमिटेडले कैलालीको धनगढीमा आफ्नो १३४ औँ शाखा सञ्चालनमा ल्याएको छ। बैंकले शाखा विस्तारका क्रममा धनगढी उपमहानगरपालिका–८, क्याम्पस चोकमा नयाँ शाखासँगै आफ्नै भवनको समेत उद्घाटन गरेको हो।

नयाँ शाखा सञ्चालनमा आएसँगै सुदूरपश्चिम प्रदेशमा एभरेष्ट बैंकका शाखाको संख्या १५ पुगेको छ। बैंकले सुदूरपश्चिम प्रदेश कार्यालयलाई पनि हालको स्थानबाट नयाँ भवनमा स्थानान्तरण गरेको जनाएको छ। अब शाखा तथा प्रादेशिक कार्यालयका सम्पूर्ण सेवा सोही भवनबाट उपलब्ध हुनेछन्।

नयाँ भवन तथा शाखाको उद्घाटन धनगढी उद्योग वाणिज्य संघका अध्यक्ष पुष्कर ओझा र बैंक सञ्चालक समितिका अध्यक्ष डा. बालगोपाल वैद्यले संयुक्त रूपमा गरेका हुन्।

उद्घाटन समारोहमा धनगढी उपमहानगरपालिका–८ का वडाध्यक्ष जुगराम चौधरी, बैंकका प्रमुख कार्यकारी अधिकृत सुदेश खालिङ, सुदूरपश्चिम प्रदेश प्रमुख यज्ञराज तिमिल्सिनासहित उद्योगी–व्यवसायी, बैंकका कर्मचारी तथा स्थानीयको उपस्थिति थियो।

धनगढीको क्याम्पस चोकमा आफ्नै भवनबाट शाखा र प्रादेशिक कार्यालय सञ्चालनमा आएपछि यस क्षेत्रको आर्थिक गतिविधि विस्तार हुनुका साथै समग्र आर्थिक विकासमा थप टेवा पुग्ने विश्वास बैंकले व्यक्त गरेको छ।