भरत दाहाललाई २४ घण्टाभित्र उपस्थित गराउन सर्वोच्चको आदेश, सरकारसँग लिखित जवाफ माग

 

काठमाण्डौ । सर्वोच्च अदालतले राजनीतिक विश्लेषक भरतमणि दाहालको बन्दीप्रत्यक्षीकरणसम्बन्धी रिटमा सरकारसँग लिखित जवाफ माग्दै उनलाई अनुसन्धानको मिसिलसहित २४ घण्टाभित्र अदालतमा उपस्थित गराउन आदेश दिएको छ।

न्यायाधीश कुमार रेग्मीको एकल इजलासले मंगलबार प्रारम्भिक सुनुवाइ गर्दै विपक्षीका नाममा कारण देखाऊ आदेश जारी गरेको हो। आदेशमा निवेदकको मागबमोजिम बन्दीप्रत्यक्षीकरणको आदेश किन जारी हुन नपर्ने हो भन्ने आधार र कारणसहित लिखित जवाफ पेस गर्न भनिएको छ।

दाहालको हकमा उनकी छोरी डेनिका दाहालले प्रधानमन्त्री तथा मन्त्रिपरिषद्को कार्यालयसहितलाई विपक्षी बनाई सर्वोच्च अदालतमा बन्दीप्रत्यक्षीकरणको रिट दायर गरेकी थिइन्।

सर्वोच्चको आदेशमा आदेश प्राप्त भएको मितिले बाटाको म्यादबाहेक २४ घण्टाभित्र अनुसन्धानको मिसिल र बन्दीसहित उपस्थित भई महान्यायाधिवक्ताको कार्यालयमार्फत लिखित जवाफ पेस गर्न भनिएको छ। तोकिएको समयभित्र जवाफ आएपछि वा समयसीमा नाघेपछि मुद्दालाई नियमानुसार पुनः पेस गर्नसमेत अदालतले आदेश दिएको छ।

रिट निवेदकका तर्फबाट वरिष्ठ अधिवक्ता ध्रुवलाल श्रेष्ठ तथा अधिवक्ताहरू युवराज कोइराला, शान्ति ढुंगाना, शुभाष सिंह धामी र निकेश धितालले बहस गरेका थिए।

दाहाललाई प्रहरीले असोज ४ गते बिहान मोरङको बेलबारीबाट पक्राउ गरेको थियो। खबरहबका अनुसार साइबर ब्युरोमा परेको उजुरीका आधारमा काठमाडौं जिल्ला अदालतबाट पक्राउ अनुमति लिएर उनलाई नियन्त्रणमा लिइएको थियो।

सर्वोच्चको पछिल्लो आदेशपछि अब दाहाललाई हिरासतमा राख्नुको कानुनी आधार र अनुसन्धानसम्बन्धी विवरणसहित सरकारी पक्षले अदालतमा जवाफ पेस गर्नुपर्ने भएको छ।