सांसदलाई सभामुखको निर्देशन– नियमावली हेर्नू, बैठकमा मर्यादित बन्नू

 

काठमाण्डौ । सभामुख डीपी अर्यालले प्रतिनिधिसभाको बैठकलाई मर्यादित र व्यवस्थित बनाउन सांसदहरूलाई निर्देशन दिएका छन्। पछिल्ला बैठकमा सांसदहरूको गतिविधिलाई लिएर प्रश्न उठेपछि सभामुख अर्यालले बैठक सञ्चालनका क्रममा प्रतिनिधिसभा नियमावलीको पालना गर्न ध्यानाकर्षण गराएका हुन्।

मंगलबारको प्रतिनिधिसभा बैठकको अन्त्यमा सभामुख अर्यालले प्रत्येक दिनको सभा मर्यादित र उत्कृष्ट बनाउनु सबै सांसदको कर्तव्य तथा दायित्व भएको बताए।

उनले प्रतिनिधिसभा नियमावली, २०८० सबै सदस्यहरूको पहलबाट लागू भएको उल्लेख गर्दै त्यसैअनुसार सभा सञ्चालन भइरहेको बताए।

सभामुख अर्यालले विशेषगरी प्रतिनिधिसभा नियमावलीको नियम २० र २१ तथा नियम २० को खण्ड ‘ट’ तर्फ सांसदहरूको ध्यानाकर्षण गराएका छन्।

उनले भने, “म सबै माननीय सदस्यहरूलाई प्रतिनिधिसभा नियमावलीको नियम २० र नियम २१, त्यसमा पनि नियम २० को खण्ड ‘ट’ प्रति यहाँहरूको ध्यानाकर्षण गराउँदछु।”

सभामुखको निर्देशनसँगै मंगलबारको प्रतिनिधिसभा बैठक सकिएको छ। अर्को बैठक बुधबार बिहान ११ बजे बस्ने गरी बोलाइएको छ।