राष्ट्र बैंक र सेबोनको सुविधासँग तुलना गर्दै बीमा प्राधिकरणका कर्मचारी आन्दोलित

काठमाण्डौ । नेपाल राष्ट्र बैंक र नेपाल धितोपत्र बोर्ड (सेबोन) लगायतका नियामक निकायमा कर्मचारीको सेवा–सुविधा तुलनात्मक रूपमा आकर्षक रहेको तर नेपाल बीमा प्राधिकरणमा भने पाउँदै आएको सुविधासमेत कटौती हुन थालेको भन्दै कर्मचारी आन्दोलनमा उत्रिएका छन् ।

बीमा प्राधिकरणका कर्मचारीले सेवा–सुविधामा समानता कायम गर्नुपर्ने र हालसम्म पाउँदै आएको सुविधा निरन्तर हुनुपर्ने माग राख्दै असोज ६ गतेदेखि दबाबमूलक कार्यक्रम सुरु गरेका हुन् ।

आन्दोलनरत कर्मचारीहरूको दाबीअनुसार राष्ट्र बैंक र सेबोनले कर्मचारीको सेवा–सुविधाका विषयमा सम्बन्धित निकायसँग प्रभावकारी समन्वय गर्दै आएका छन् । तर, बीमा प्राधिकरणको नेतृत्वले अर्थ मन्त्रालयसँग आवश्यक समन्वय र पहल गर्न नसक्दा आफूहरू निरन्तर पछि परेको उनीहरूको आरोप छ ।

प्राधिकरणका कर्मचारीहरुले अन्य नियामक निकायमा सुविधा विस्तार भइरहेका बेला बीमा प्राधिकरणमा भने सुविधा कटौती हुनु विभेदपूर्ण भएको गुनासो गरेका छन् ।  

उनीहरुका अनुसार पछिल्लो समय बजेट तथा सेवा–सुविधामा थप संकुचन आएको छ । प्राधिकरणका लागि एक करोड रुपैयाँ बजेट छुट्याइए पनि स्वीकृत बजेट १५ लाख रुपैयाँमा सीमित भएको र बुधबारदेखि सवारी सुविधा समेत रोकिएको उनीहरूको भनाइ छ ।

राष्ट्र बैंक र सेबोनले आफ्ना कर्मचारीका विषयमा सक्रिय भूमिका खेलिरहेको तर बीमा प्राधिकरणले भने त्यस्तो संस्थागत पहल गर्न नसकेको कर्मचारीहरुको आरोप छ ।  

साथै सेवा–सुविधाको विषय मात्र नभई प्राधिकरणको नेतृत्वको समन्वय क्षमता र संस्थागत कार्यसम्पादनमाथि समेत कर्मचारीहरुले प्रश्न उठाएका छन् । नेतृत्वले अर्थ मन्त्रालय तथा बीमा कम्पनीका उच्च अधिकारीसँग प्रभावकारी समन्वय गर्न नसकेको उनीहरूको आरोप छ ।

आन्दोलनरत कर्मचारीहरूले बुधबार प्राधिकरणका कार्यकारी निर्देशक सुशीलदेव सुवेदीसँग छलफलसमेत गरेका छन् । माग सम्बोधन नभएसम्म धर्ना, छलफल तथा अन्य दबाबमूलक कार्यक्रम जारी राख्ने उनीहरूले बताएका छन् ।