बुल मेसिन खरिदमा मुक्तिनाथ विकास बैंकले ८० प्रतिशतसम्म कर्जा दिने

काठमाडौं । मुक्तिनाथ विकास बैंक र अटोवेज प्रालिबीच निर्माण उपकरण ‘बुल मेसिन’ खरिद गर्न चाहने ग्राहकलाई कर्जा उपलब्ध गराउने समझदारी भएको छ। नेपालका लागि बुल मेसिनको आधिकारिक वितरक अटोवेजसँग बैंकले असोज ८ गते समझदारीपत्रमा हस्ताक्षर गरेको हो।

समझदारीअनुसार खरिद गरिने मेसिनलाई नै धितो राख्दा बैंकले डिलरको बिल वा इन्भोइस मूल्यको ५० प्रतिशतसम्म कर्जा दिन सक्नेछ। ग्राहकले बैंकलाई स्वीकार्य थप स्थिर सम्पत्ति धितो राखेमा भने प्रचलित कर्जा नीति र मूल्यांकनका आधारमा इन्भोइस मूल्यको ८० प्रतिशतसम्म कर्जा उपलब्ध हुन सक्ने बैंकले जनाएको छ। थप धितो राख्ने ग्राहकका लागि न्यूनतम ब्याजदरमा कर्जा उपलब्ध गराउने उल्लेख भए पनि विज्ञप्तिमा ब्याजदरको अंक खुलाइएको छैन।

समझदारीपत्रमा बैंकका गण्डकी क्षेत्र प्रमुख बाबुराम ढकाल र अटोवेजका अध्यक्ष तथा प्रबन्ध निर्देशक नारायणप्रसाद पौडेलले हस्ताक्षर गरेका छन्।

निर्माण व्यवसायमा प्रयोग हुने उपकरण किन्दा सुरुमै ठूलो रकम जुटाउनुपर्ने भएकाले कर्जा सीमाले खरिदकर्ताको आफ्नै लगानी कति चाहिन्छ भन्ने निर्धारण गर्छ। यस योजनामा मेसिन मात्रै धितो राख्ने र थप अचल सम्पत्ति धितो राख्ने ग्राहकका लागि कर्जाको अधिकतम सीमा फरक छ। ८० प्रतिशत कर्जा सबै खरिदकर्ताले स्वतः पाउने व्यवस्था भने होइन; स्वीकृति बैंकको मूल्यांकन र कर्जा नीतिमा निर्भर रहनेछ।