विवादित विज्ञापनपछि कन्भर्सले रोक्यो सबै मार्केटिङ अभियान

काठमाण्डौ । नाइकीको स्वामित्वमा रहेको जुत्ता ब्रान्ड कन्भर्सले विवादित विज्ञापनका कारण यस साताका सबै मार्केटिङ गतिविधि स्थगित गरेको छ। ब्लुमबर्ग न्युजले निर्णयबारे जानकार व्यक्तिलाई उद्धृत गर्दै यस्तो जानकारी दिएको हो।

कन्भर्सले गत साता सार्वजनिक विरोध भएपछि उक्त विज्ञापन हटाउँदै माफी मागेको थियो। कम्पनीले विज्ञप्तिमार्फत “हामीबाट गल्ती भयो” भन्दै विज्ञापनप्रति खेद व्यक्त गरेको थियो।

विवादित विज्ञापनमा सेतो रङको घुँडासम्म पुग्ने स्कर्टजस्तो पहिरन लगाएको व्यक्तिको तल्लो भाग देखाइएको थियो। केही आलोचकहरूले उक्त पहिरनलाई अमेरिकी अतिवादी संगठन कु क्लक्स क्लानले प्रयोग गर्ने पोसाकसँग मिल्दोजुल्दो भएको बताएका थिए। विज्ञापनमा उक्त व्यक्तिले कालो रंगका जुत्ता समातेको देखाइएको थियो।

यो विज्ञापन कन्भर्सको चक७० एक्स जुत्ताका लागि तयार गरिएको अभियानको हिस्सा थियो। उक्त अभियान दक्षिण कोरियाली के–पप समूह एस्पाकी सदस्य करिनासँगको सहकार्यमा बनाइएको थियो।

विवादित विज्ञापनले अमेरिकी सांसदहरूको समेत ध्यान तानेको थियो। अमेरिकी कांग्रेसको ब्ल्याक ककसले सोमबार जारी गरेको विज्ञप्तिमा कन्भर्सको विज्ञापन अभियानप्रति “गहिरो चिन्ता र निराशा” व्यक्त गर्दै नाइकीका अधिकारीहरूसँग भेटको माग गर्ने जनाएको थियो।

कन्भर्सको बिक्री पछिल्ला १३ त्रैमासिकदेखि लगातार घटिरहेको छ। पछिल्लो चौथो त्रैमासिकमा स्थिर विनिमय दरका आधारमा कम्पनीको बिक्री ३४ प्रतिशतले घटेको बताइएको छ।

नाइकीले आगामी साता पहिलो त्रैमासिक वित्तीय नतिजा सार्वजनिक गर्ने तयारी गरिरहेको छ। कम्पनीका प्रमुख कार्यकारी अधिकृत इलियट हिलले व्यवसाय पुनरुत्थानका लागि प्रयास गरिरहेका भए पनि लगानीकर्ताले अझै स्पष्ट सुधारका संकेत खोजिरहेका छन्।

यस वर्ष नाइकीको सेयर मूल्य ४० प्रतिशतभन्दा बढी घटेको छ। लगानीकर्ताले कम्पनीको वृद्धि पुनःस्थापित गर्ने प्रयासले अपेक्षित परिणाम दिन थालेको प्रमाण खोजिरहेका छन्।