बैंककमा आपतकाल घोषणा

काठमाडौँ । लगातार ४८ घण्टासम्म परेको भारी वर्षाले थाइल्यान्डको राजधानी बैंककका सडक जलमग्न भएका छन्। बाढीको जोखिम बढेपछि सहरका सबै ५० जिल्लालाई संकटग्रस्त क्षेत्र घोषणा गरिएको बीबीसी नेपालीले जनाएको छ।

स्थानीय प्रशासनले बासिन्दालाई सकेसम्म घरभित्रै बस्न आग्रह गरेको छ। नहरछेउका बासिन्दालाई पानीको सतह बढ्न सक्ने भन्दै आफ्ना सामान माथिल्लो तलामा सार्न भनिएको छ।

लगातारको वर्षाले नहरहरू भरिएका छन् र सडकमा जमेको पानी निकास गर्न कठिन भएको छ। बैंककका गभर्नर चाडचार्ट सिट्टिपुन्टका अनुसार सहरको पूर्वी भाग बढी प्रभावित छ। पानी बाहिर निकाल्ने प्रयास भइरहे पनि नहर भरिएकाले तिनको आसपास बस्नेहरू जोखिममा रहेको उनले बताएका छन्।

मध्य बैंकककी एक ६७ वर्षीया बासिन्दाले आफ्नो क्षेत्रमा कम्मरसम्म पानी पुगेको एएफपीलाई बताएकी छन्। उनका अनुसार वर्षा नरोकिँदा घरबाहिर निस्कनसमेत कठिन भएको छ।

थाइल्यान्डको मौसम निकायले थप भारी वर्षा हुन सक्ने चेतावनी दिएको छ। आइतबार पनि वर्षा जारी रहने पूर्वानुमानसँगै डुबान अझ फैलिन सक्ने चिन्ता बढेको छ। प्राप्त विवरणअनुसार पछिल्लो बाढीबाट मानवीय क्षतिको सूचना आएको छैन।