भारतमा नयाँ बैंक नियमः बल्क एफडीको ब्याजदर दैनिक सार्वजनिक गर्नुपर्ने

नयाँ दिल्ली । भारतीय रिजर्व बैंक (आरबीआई) ले फिक्स्ड डिपोजिट (एफडी) सम्बन्धी महत्वपूर्ण नियम परिवर्तन गरेको छ। १ अक्टोबर २०२६ देखि लागू हुने यो नयाँ नियम अनुसार अब सबै बैंकहरूले हरेक कार्यदिवस (वर्किङ डे) मा आफ्नो वेबसाइटमा बल्क एफडी को ब्याजदर अनिवार्य रूपमा सार्वजनिक गर्नुपर्नेछ।

नयाँ नियम के हो ?

-बैंकहरूले हरेक कार्यदिवस बिहान १०:०० बजेसम्म (अतिरिक्त १० मिनेटको मोहलतसहित १०:१० बजेसम्म) बल्क एफडीको नयाँ ब्याजदर वेबसाइटमा अपडेट गर्नुपर्नेछ।

-त्यस दिन वेबसाइटमा प्रकाशित भएको ब्याजदर नै त्यस दिन एफडी गर्दा ग्राहकलाई दिनुपर्नेछ। बैंकहरू यसबाट बाध्य हुनेछन्।

कुन एफडीमा लागू हुन्छ ?

यो नियम मुख्य रूपमा बल्क एफडी मा लागू हुन्छ। व्यावसायिक बैंकहरूमा सामान्यतया ३ करोड रुपैयाँ वा सोभन्दा माथिको निक्षेपलाई बल्क डिपोजिट मानिन्छ। सामान्य वा सानो रकमको एफडी गर्ने ग्राहकहरूलाई यस नियमले कुनै असर पार्दैन।

शाखाअनुसार फरक दरको अन्त्य

अहिलेसम्म एउटै बैंकका फरक-फरक शाखाले ठूलो रकम जम्मा गर्ने ग्राहकलाई फरक-फरक ब्याजदर प्रस्ताव गर्ने गरेका थिए। नयाँ नियम लागू भएपछि एउटै दिन, समान रकम र समान अवधिको बल्क एफडीमा बैंकहरूले शाखाअनुसार मनपरी फरक दर दिन पाउने छैनन्।
केवल लिक्विडिटी कभरेज रेसियो (एलसीआर) सम्बन्धी विशेष नियमअनुसार मात्र केही अवस्थामा फरक दर राख्न सकिनेछ।

ग्राहकलाई के फाइदा?

ठूलो रकम जम्मा गर्ने व्यक्ति वा संस्थाहरूलाई अब दैनिक रूपमा सटीक ब्याजदर सजिलै उपलब्ध हुनेछ। बैंक कर्मचारीले गुमराह गर्न नसक्ने र ग्राहकहरूले विभिन्न शाखामा घुम्दै मोलमोलाइ गर्नुपर्ने बाध्यता अन्त्य हुनेछ। यसले ब्याजदरमा पारदर्शिता बढाउने र वित्तीय लेनदेनलाई थप व्यवस्थित र निष्पक्ष बनाउने अपेक्षा गरिएको छ।

यो नियमले ठूला निक्षेपकर्ताहरूलाई स्पष्ट जानकारी दिने र बैंकहरूबीच प्रतिस्पर्धालाई थप पारदर्शी बनाउने लक्ष्य राखेको छ।