भसभसे पहिरोले बागलुङ–बेनी सडक जोखिमपूर्ण, घण्टौँ जाम

म्याग्दी । बेनी नगरपालिका–२ स्थित भसभसेको पहिरो म्याग्दी र मुस्ताङलाई राष्ट्रिय राजमार्गसँग जोड्ने वैकल्पिक बागलुङ–बेनी सडकको मुख्य चुनौती बनेको छ। असोज ८ देखि ११ गतेसम्मको वर्षापछि म्याग्दी र कालीगण्डकी नदीको दोभान नजिकै बाढीले सडक कटान गर्दा यातायात सञ्चालनमा कठिनाइ हुनुका साथै दुर्घटनाको जोखिम बढेको छ।

पर्वत र बागलुङ जोड्ने मालढुङ्गाको पुलको पहुँचमार्ग कालीगण्डकीले बगाएपछि बागलुङ, रुकुम पूर्व–पश्चिम र जाजरकोटबाट पोखरा–काठमाडौँ आवतजावत गर्ने सवारीसाधनसमेत यही वैकल्पिक सडकमा निर्भर छन्। सडक करिब एक सय मिटर क्षेत्रमा दुईदेखि तीन मिटर भासिएपछि सवारीसाधन हिलोमा फस्ने र घण्टौँ जाम हुने समस्या देखिएको छ।

सडक डिभिजन कार्यालय बागलुङले यसअघि भूमिगत पानी व्यवस्थापन र ढलान गरे पनि सडक पुनः भासिएको छ। जिल्ला समन्वय समिति म्याग्दीकी कार्यवाहक प्रमुख डिलकुमारी खत्रीका अनुसार ग्राभेल राख्दा पनि सडक दबिने क्रम नरोकिएकाले फसेका सवारीसाधन डोजरको सहायताले निकाल्ने गरिएको छ। पहिरोका कारण खबरा गाउँसमेत जोखिममा परेको छ। समस्याको दीर्घकालीन समाधानका लागि नदी किनारमा तटबन्ध निर्माण, पहिरोग्रस्त सडकको सतह मिलाउने र पक्की बनाउने पहल भइरहेको उनले बताइन्।