पशु वधशाला तथा मासु जाँच ऐन कार्यान्वयन गर्न १५ कार्यदल गठन

काठमाडौं । पशु वधशाला तथा मासु जाँच ऐन, २०५५ कार्यान्वयनका लागि सरकारले बागमती प्रदेशमा १५ वटा कार्यदल गठन गरेको छ ।

पशु सेवा विभागले काठमाडौं उपत्यकामा सहसचिवको नेतृत्वमा तीन र उपत्यकाबाहिरका १२ जिल्लामा उपसचिवको नेतृत्वमा कार्यदल गठन गरेको हो ।

कार्यदलले स्थानीय तहसँग समन्वय गरी मासु व्यवसायीलाई पशु वध गर्नुअघि र पछि अनिवार्य स्वास्थ्य परीक्षण, मासुको चिस्यान व्यवस्थापन, तौलअनुसार प्याकेजिङ, मूल्य निर्धारण तथा सरकारी लोगो प्रयोगबारे प्रशिक्षण दिनेछ । साथै उपभोक्तामा जनचेतना फैलाउने काम पनि गर्नेछ ।

विभागका महानिर्देशक डा. उमेश दाहालका अनुसार मासुको गुणस्तर सुनिश्चित गर्न जनस्वास्थ्य संरक्षण कार्यालय स्थापना र मासु निरीक्षक तोक्ने विषयमा स्थानीय सरकारसँग सहकार्य गरिनेछ ।

विभागले व्यवसायीलाई पसल दर्ता तथा नवीकरण, सरसफाइ, सङ्क्रमण रोकथाम र कारोबारको अभिलेख व्यवस्थित राख्न पनि आग्रह गरेको छ ।