भारतमा एपलको आम्दानी अहिलेसम्मकै उच्च, शेयर ४ प्रतिशत घट्यो

काठमाडौं । अमेरिकी प्रविधि कम्पनी एपलले भारतमा सेप्टेम्बर त्रैमासमा अहिलेसम्मकै उच्च आम्दानी गरेको छ । कम्पनीका प्रमुख कार्यकारी अधिकृत (सीईओ) जोन टर्नसले भारतमा आईफोन र म्याक कम्प्युटरको माग सर्वाधिक उच्च रहेको बताएका छन् ।

भारतमा आईफोन प्रयोगकर्ताले पुराना मोडलबाट नयाँमा स्तरोन्नति गर्ने क्रम बढ्नुका साथै म्याक र सेवा व्यवसायको विस्तारले आम्दानी बढाउन सहयोग गरेको कम्पनीले जनाएको छ । सहज किस्ताबन्दी, पुराना फोनको राम्रो मूल्य, भारतमै उत्पादन र साना सहरसम्म बजार विस्तारलाई पनि वृद्धिको मुख्य आधार मानिएको छ ।

एपलको विश्वव्यापी आम्दानी भने गत वर्षको सोही अवधिको १०२ अर्ब ५० करोड डलरबाट बढेर ११४ अर्ब ५० करोड डलर पुगेको छ । त्यस्तै, वार्षिक आम्दानी ४१६ अर्ब डलरबाट बढेर कीर्तिमानी ४७९ अर्ब डलर पुगेको छ ।

यद्यपि, मेमोरी चिपको मूल्य वृद्धि र कृत्रिम बुद्धिमत्तामा आधारित सिरीको विस्तारमा बढ्दो खर्चका कारण नाफाको मार्जिन घट्ने अनुमान सार्वजनिक भएपछि एपलको शेयर कारोबारपूर्व बजारमा करिब ४ प्रतिशतले घटेको छ । सेप्टेम्बर त्रैमासमा ४७.९ प्रतिशत रहेको कुल नाफा मार्जिन आगामी त्रैमासमा ४५ देखि ४६ प्रतिशतमा झर्न सक्ने कम्पनीको अनुमान छ ।