सरकारका सय दिनः सेयर बजारका लागि उपलब्धिविहीन, अर्थमन्त्रीको कुरा ठूला काम शून्य !

काठमाण्डौ । दुई ठूला दल नेपाली काङ्ग्रेस र नेकपा एमाले मिलेर बनेको अहिलेको सरकारले एकसय दिन पूरा गरेको छ । इतिहास पल्टाएर हेर्ने हो भने यो सरकार ०४८ सालपछिकै शक्तिशाली हो । दुई ठूला दलमा अन्य केही साना दल मिल्दा करिब २ तिहार्इ बहुमत समर्थन प्राप्त सरकार बनेको देखिन्छ ।  

बाहिरबाट हेर्दा यो सरकार निकै शक्तिशाली देखिन्छ । त्यति मात्रै नभएर प्रदेशदेखि केन्द्रसम्म यिनै दुई ठूला दलको सरकार छ । देशमा संवैधानिक अंगहरु, अड्डा अदालत तथा अख्तियारसम्म पनि यहि सरकारकै दबदबा रहेको छ ।  

यी सबै विषय सरकारको पक्षमा हुँदाहुँदै पनि सरकारले आवश्यक समन्वय गर्न नसक्दा जनतामा देखिने गरी खासै काम भने हुन सकेको छैन ।  

यसकारण सेयर बजारलाई शून्य

नयाँ सरकार र नयाँ अर्थमन्त्री बनेसँगै पूँजीबजारमा नयाँ उमंग छाएकोे थियो । अर्थमन्त्रीमा विष्णु पौडेल आएपछि सेयर बजारमा सुधार आउने आशामा पूँजीबजारले करिब १ हजार अंकको छलाङ मारेको थियो ।  

लामो समय पूँजीबजारले गति लिन नसकिरहेको अवस्थामा अर्थमन्त्रालयमा विष्णुप्रसाद पौडेल आएपछि नेपाल राष्ट्र बैंकसँग ट्युनिङ मिल्ने र नीतिहरुमा केही पुनरावलोकन हुने अपेक्षा लगानीकर्ताहरुमा थियो । तर, अपेक्षा विपरीत नेपाल राष्ट्र बैंकको नीतिमा धेरै बदलाब देखिएन । संस्थागत लगानीकर्ताहरुलाई क्याप खोल्नेबाहेक नीतिमा केही पनि फेरबदल भएन ।  

लगानीकर्ताहरुले राखेका मुख्य मागहरुमा जोखिमभार घटाउने , व्यक्तिगततर्फ पनि सेयर धितो कर्जाको सीमा हटाउने जस्ता बुँदाहरु समावेश थिए । जुन विषय मौद्रिक नीतिमा समेटिएनन् । यसले पनि लगानीकर्ताहरुमा सोचेजस्तो उत्साह आएन । जसको कारण ३ हजारमाथि पुगेको बजार पुनः २५ सय तल आयो ।  

लगानीकर्ताले नयाँ सरकारकाबाट अपेक्षा गरेको अर्को मुख्य विषय धितोपत्र बोर्डको अध्यक्षको शीघ्र नियुक्ति पनि हो । जुन विषय १० महिनादेखि अलपत्र छ ।  

गत पुस २० गतेदेखि ३ वटा अर्थमन्त्री फेरिए तर, धितोपत्र बोर्डको अध्यक्ष नियुक्त गर्न कुनै पनि सरकारले सकेको छैन । केपी शर्मा ओली नेतृत्वको सरकारको पनि एकसय दिन पूरा भएको छ । अर्थमन्त्रीेले केही प्रयास गरेको जस्तो देखिन्छ । तर परिणाम देखिने गरी केही पनि काम हुन सकेका छैनन् ।  

यतिमात्रै नभएर अर्थमन्त्रालयमा पुगेर पूँजीबजार सुधारसम्बन्धी धेरै फाइलहरु अड्किएका छन् । जस्तो नेप्सेको पुनर्संरचना, नेप्से ३० तथा अन्य विविध साना–साना फाइलहरु पनि अर्थमा नै अड्किएका छन् । यस हिसाबले हेर्दा यो सरकारका एकसय दिन लगानीकर्ताहरुको लागि कागलाई बेल पाक्यो, हर्ष न बिस्मात जस्तो मात्र भएको छ ।  

नेपाल सेयरधनी सँघका अध्यक्ष घनश्याम पाण्डेले सरकारले काम गर्न खोजेको तर परिणाम भने नदेखिएको बताउँछन् । पाण्डे भन्छन्, ‘पहिलाका अर्थमन्त्रीले पनि चासो दिएका हुन् तर काम भएन । अहिले पनि गर्न खोजेको देखिन्छ तर गर्नसक्ने काम जस्तैः धितोपत्र बोर्ड अध्यक्षको नियुक्ति , एनआरएनलाई पूँजीबजारमा ल्याउने विषय, ब्रोकरमार्फत नै मार्जिन कारोबार तथा राष्ट्रबैकसँग समन्वय गरेर अझै  पूँजीबजारमैत्री र लचक नीति आउन सकेको छैन । हामीले युवराज खतिवडा र अर्थमन्त्रीसँग निरन्तर सल्लाह गरेका छौं  । आशा छ अर्थमन्त्री पौडेल बिदेशबाट फर्किएपछि काम ले गति लिने छ ।’  

हाल अर्थमन्त्री एउटा कार्यक्रममा सहभागी हुन अमेरिका पुगेका छन् ।